Rakhe ka Eastern West Khasi Hills ïa ka sngi pyrshah ïa ka jingdih bad khaïi drok
![](https://mawphor.com/wp-content/uploads/2023/06/4-Copy.jpg)
Mairang, Jylliew, 28: Kum shibynta jong ka jingrakhe ïa ka International Day against Drug Abuse and Illicit Trafficking, ka ophis jong ka Child Development Project Officer, Mairang, Integrated Child Development Services Project ha ryngkat ka jingïatreilang bad ka tnad pulit jong ka Eastern West Khasi Hills District Mairang, ha ka 26 tarik u Jylliew 2023, ka la pynlong ïa ka prokram pynshai paidbah halor kane ka phang ïa kaba la pynlong ha St.Thomas Higher Secondary School, Mairang ha kaba u Additional Superintendent of Police ka Eastern West Khasi Hills District, u Bah P Suchiang u la leit kum u kongsan ha ka jingïasakhi lang jong u Deputy Superintendent of Police ka Eastern West Khasi Hills, u Bah D Nongpluh, ka Child Deve-lopment Project Officer (CDPO) ka Mairang ICDS Project, ka Kong B.Rynjah, ka Vice Principal ka St. Thomas Higher Secondary School, Mairang, ka Sister Cecilia Kujur, u Inspector ka tnat pulit, u Bah S. Kharjana, ki nonghikai bad kumba 250 ngut ki khynnah pule ka thaiñ.
Haba ai jingkren ha kane ka sngi, u Additional Superintendent of Police, Eastern West Khasi Hills Mairang, u Bah P Suchiang u la ong ba ka jingthmu jong kane ka prokram ka long ban pynshai sha ki khynnah pule halor ki jingsniew kiba mih na ka jingpyndonkam ïa ki drok kiba la kynrei bha ha kine ki sngi kiba mynta kaba ktah kylla ïa ka jingim bad jingmut jingpyrkhat jong ki nongshongshnong khamtam eh ki khynnah pule.
Shuh shuh, u Bah Suchiang u la kyntu ïa baroh kiba la ïa wan sha kane ka prokram, ba kin ring jingmut na ki riew pawkhmat ka thaiñ kiba la wanrah burom ïa ka distrik ha ka liang ki kam ïalehkai, ha ka pule puthi bad kumta ter ter bad u la ban jur ruh ba ki dei ban kiar raimaw raidieng na ka jingpyndonkam ïa ki jingdih pynbuaid kum u drok bad kumta ter ter.
Katba, ka Child Development Project Officer ka Mairang ICDS Project ka Kong B. Rynjah ha ka jingkren ka jong ka, ka la batai shaphang ka jingthmu jong kane ka sngi bad ka la khot la wer ruh ïa baroh ba kin kiar na ka jingniew beiñ bad jingkheiñ beiñ ïa kito kiba la ngop ha ka jingdih drok bad ban ïarap pynban ïa ki, khnang ba kin lah ban lait na ka jingshahteh mraw ha kiba kum kine ki jait jingsniew.
Ka CDPO ka la ban ruh halor ka jingdonkam ïa ka jingïatreilang jong ki longïing, ki seng trei mon sngewbha, ki kynhun niam bad ki tnat sorkar na ka bynta ban khyllie bad pynphai pat ïa kito kiba la kyrni sha ka lynti jong ka jingbha bad ka la kyntu ruh ïa baroh ban ïasnohkti lang ha kane ka thma pyrshah ïa u drok.
Kiwei kiwei pat ki bynta jong kane ka prokram ki kynthup ïa ka drama na ki khynnah pule jong ka St. Thomas Higher Secondary School, Mairang ïa kaba la ai kyrteng ‘Ka jingktah jong u drok’ bad ka jingïapule lang ïa ka pledge ïa kaba la ïalam da ka Sister Cecelia Kujur.