Nongpoh, Lber 25: Ka ophis jong ka District Tuberculosis Officer ryngkat ka jingïatreilang bad ka District Medical Health Officer, Ri-Bhoi District ka la rakhe ïa ka World Tuberculosis Day ha Parish Hall, Nongpoh bad pynkut noh ïa ka jingïalap ba 100 sngi ha kaba ïadei bad ka jingthmu ban pynsted ïa ka jingïaleh pyrshah ïa ka jingpang TB, ban pynduna ïa ka jingpynslem ban lap ïa ka jingpang, bad khamtam ban ïakhun kumno ban pynduh jait ïa katei ka jait jingpang halor ka phang Yes we can end TB: Commit, Invest, Deliver.
Ha katei ka jingrakhe ïa ka World TB Day la wan ruh ban shim bynta da u Bah Mayral Born Syiem MLA ka Nongpoh ba dei ruh u Chairman ka Meghalaya State Health Advisory Board kum u kongsan ha ka jingdonlang ka kong B Ranee ADC ka Ri-Bhoi, ka Dr. AJ Kharduid DMHO ka Ri-Bhoi, ka Dr E Kalwing District Tuberculosis Officer, Dr CM Pohshna Medical Superintendent ka Bethany Hospital Outreach Nongpoh, ki khynnah skul lem, ki nongtrei ka koit ka khiah bad ki nongïalam shnong.
Kumba la maitphang da ka Dr E Kalwing, ka la ïathuh ba kumba long haduh mynta la lap ba don kumba 101 ngut ki briew kiba im bad ka jingpang TB ha Ri-Bhoi District ha kine ki 100 sngi ka jingwad bñiah kaba la hiar na ka 400 ngut ha u snem 2024 bad kane baroh ka dei ka jingtreikam ba shitrhem jong ka District NTEP naduh ki ASHA lem bad ki nongtrei ka tnad ka koit ka khiah kiba la leit sha ki ïing ki sem bad ki shnong ki thaw ban wad ïa ki briew khamtam kiba tlot ka bor met bad kiba don kiwei ki jait jingpang bad ruh ban rah sha ki jaka sumar ban pyndep ïa ki jingleh test bad kane ka jingtrei shitom ka long ban lap ne shem kham kloi ïa ki nongpang bad pynduna ruh ïa ka jingpur sted namar kane ka jingpang ka long kaba ïabit.
Shuh shuh ka la ong ba na ka liang ka tnad ka koit ka khiah ka la pyndonkam ruh ïa ki Artificial Intelligence Based Mobile Digital X-Ray bad ha kane ka 100 sngi ka jingïalap la pyndonkam haduh 5 tylli kitei ki mashin ha man la ki dong bad ki jaka ban pynrung bad pynshai sha ki paidbah bad kumjuh ruh ban pynthikna ïa ka jingpang TB kham kloi ha ki jaka ba jngai ki jaka sumar.
U Bah Mayral Born Syiem haba kren ha kane ka sngi u la ong ba ka jingpryshang ban pynduh pyndam ïa kane ka jingpang ka la don ha u mawjam ban poi sha ka thong, kumba na ka liang ka sorkar ka thaw ïa ki lad ki lynti kumno ban pynduh jait ïa kane ka jingpang bad kaba sngewsih ka long ba kum u nongmihkhmat haba u leit sha ki jaka ba pynlong ïa ki prokram ai jinghikai bun na ki paidbah kim kheiñ snep ba kim shimkhia satia.
Kumta u la kyrpad ruh ïa ki paidbah naduh ki nongïalam shnong, ki longkmie longkpa ba kin ai ka kti kamon ka diang ban ïakhun ïa kane ka jingpang bad ban pynlong ïa ka district, ka jylla bad ka ri kaba lait na ka jingpang TB.
Ha kane ka sngi na ka liang ka ophis jong ka DTO ka la sam ruh ïa ki khusnam sha ki 60 tylli ki shnong kiba la tip kum ki shnong kiba la lait na ka jingpang TB ne ka TB Free Village, bad kumjuh ruh sha ki nongtrei ka koit ka khiah, ki riew shimet, ki kynhun bad kiwei kiwei kiba la don bynta ban nohsynñiang ban ïakhun ïa kane ka jingpang.
