Shillong, Lber 25: Ka NIFT Shillong ha ka sngi baar ka la ïoh ban plie ïa ka Craft Bazaar, kaba dei ka ïew kaba ar sngi ka ban pyni ïa ka jingriewspah ka kolshor jong kane ka thaiñ shatei lammihngi. Ïa kane ka prokram la wan ban long kongsan da u N Munish Singh, Regional Director of ICCR (Indian Council for Cultural Relations) bad u Shankar Kumar Jha, Director of NIFT Shillong.
U Jha, u la pdiang sngewbha ïa kiba la shah khot sngewbha bad u la banjur ïa ka jingdonkam ka Craft Bazaar ka ban kyntiew ïa ka kolshor kane ka thaiñ shatei lammih ngi. “Ka NIFT Shillong ka angnud ban pynneh pynsah bad ban kyntiew ïa ki kolshor kane ka thaiñ shateilammihngi. Ka Craft Bazaar jong ngi ka ai ka rynsan ïa ki artisan na kylleng kane ka thaiñ ba kin lah ban pyni ïa ki jingshna jong ki bad ba kin lah ban ïasyllok bad ki designer bad kiwei kiwei. Ha kane ka snem ngi la kho sngewbha ïa kumba 25 ngut ki artisan ba kin ïa shim bynta ha kane ka prokram.”
U N Munish Singh, haba ïaroh ïa ka jingpyrshang ka NIFT Shillong ban kyntiew ïa ki kam shna tiar ula pynpaw ruh ka jingdonkam jong kiba shna tiar ba kin sdang da ki kam kiba thymmai bad kiba long ruh katkum ka jingdawa jong ka ïew ka hat. “Ka long kaba ai mynsiem ban kyntiew ïa ka kolshor jong kane ka thaiñ shatei lamihngi. Nga kyntu ïa ki artisan ba kin pynïar ïa ki kam khaiï jong ki khnang ba kin lah ban poi sha ka ïew ka hat.”
Lah ban ong ba ka NIFT Shillong Craft Bazaar ka dei na ka bynta ban kyntiew bad ban pynneh pynsah ïa ka jingriewspah ka kolshor jong ka ri India bad ki jinghiar pateng jong ka. ïa kane ka prokram yn pynkut ha ka 26 tarik mynta u bnai ha kaba la shah ruh ïa ki paidbah ba kin wan ban shim bynta.
