Shillong, Ïaiong 07 : Ka BJP Meghalaya ha ka sngi Palei ka la rakhe ïa ka jingdap 44 snem ka jingseng ïa ka (Foundation Day) ha ka jingïalang kaba long ha ophis treikam jong ka party ha kylleng ki bynta jong ka rilum Khasi, Jaiñtia bad ruh ha rilum Garo.
Kum shi bynta jong katei ka jingrakhe, la kyntiew ruh ïa ki lama jong ka party ha ka ophis treikam jong ka party ha ka nongbah da u President ka BJP Meghalaya, u Bah Ernest Mawrie ryngkat ka jingdonlang ki nongkitkam jong ka party.
Ha kane ka jingïalang la kynmaw burom ruh ïa ki nongseng jong ka party, Dr. Shyama Prasad Mukherjee bad Pandit Deen Dayal Upadhya ba la bud pat sa ka live video na u Myntri Rangbahduh ka Ri, u Narendra Modi bad President ka BJP ha ka ri, u JP Nadda.
Kum shi bynta ka jingrakhe, ka BJP ka la pynlong ruh ia ka Sewa Hi Saptah, ka prokram ba shi taiew pura kaba sdang naduh hynne ka sngi haduh ka 14tarik u Ïaiong kaba dei ka lyngkhuh sngi kha jong u Baba Saheb Ambedkar.
Nalor ka jingkren jong u JP Nadda la ïoh ruh ïa ka jingkren na u PM Modi uba la kynmaw burom ïa ki nongseng jong ka party kiba la ïohi jngai bad aiti lut ïalade na bynta ban kyntiew ïa ka party. Ha kajuh ka por u la ai khublei ruh ïa baroh ki nongkitkam jong ka party.
