Shillong, Nohprah, 22: Ka BJP Mahila Morcha ha ka sngi Thohdieng ka la rakhe ïa ka Christmas bad khynnah ba la ri bad sumar da ka Gods Dream Home kaba don ha ka shnong Pynthorbah ha ryngkat ka jingsakhi lang jong u Myntri ka Sorkar Jylla u Bah AL Hek uba long ruh u MLA jong ka BJP. u Chief Spokesperson jong ka BJP u Bah M. Kharkrang, ka President jong ka Mahila Morcha ka Kong Sukhi Pariat bad kiwei kiwei ki nongkitkam jong ka party.
Ha kane ka jingrakhe la pynlong ïa ka jingduwai kaba kyrpang na u Pastor Crosslin Marbaniang bad la sam ruh ïa ki jingai sngewbha sha ki khynnah kiba la ri ha kane ka ing ri khunswet.
Ha kajuh ka por, ka BJP Youth Wing, BJYM ka la rakhe ïa ka Christmas ha Reid Chest, TB Hospital Shillong ha kaba ki nongïalam jong ka seng ki la ïakynduh ruh ïa ki nongthiah pang, ki bahaiing bad ïa ki nongtrei jong kane ka jaka ai jingsumar.
U President ka BJYM, u la ïasyllok bad wad jingtip ïa ka jingduna ba ki nongpang ki ïakynduh na ka por sha ka por.
“U Myntri Rangbahduh jong ka ri u Narendra Modi bad u National President ka BJP u J.P Nadda ki don ïa ka jingthmu ban buddien halor ka jingbuh ïa ki Awareness Program bapher bapher ban pynduh tyllong ïa ka jingpang Tuberculosis lyngba ka TB Mukt Bharat Abhiyan shuwa u snem 2025,” la ong u nongïalam ka BJYM.
U la kyrpad ïa ki nongpang ba kin wad jingtip shaphang ka skhim kaba la ai sha ki briew kiba don ïa ka jingpang TB ïa kaba la tip kum ka Nikshay Poshan Yojana Scheme kaba lah ban ai jingïarap ïa ka jingtei ka koit ka khiah ïa ki briew ba don ïa ka jingpang TB.
Ha kane ka sngi, ka BJP Schedule Tribe (ST) Morcha ka la pynlong ïa ka jingrakhe bad ki khynnah baduk ha Anganwadi Centre, Shillong cantonment da ka jingsakhi lang jong ka ST Morcha State General Secretary ka Kong Euneescy Khyriem, ka Vice President ka Kong Priambada Blah bad ka ST Morcha Shillong City President ka Kong Wanpynbiang Tariang.
La sam ruh ïa ki jingai sngewbha bad ïa kiwei pat ki jingai sngewbha ba ki khynnah kin dup lah ban pyndonkam ha ka pule puthi.
