Nongpoh, Nohprah 10: Kumba la rakhe kyrpang ïa ki sngi ba kyrpang ki khynnah ri ha ki balang bapher bapher jong ka Balang Presbyterian ba hap ha ka Ri Bhoi Synod, ka Balang Presbyterian Umdihar ruh ka la pynlong ïa kane ka jingrakhe ba kyrpang ïa ka sngi kyrpang ki Heprit ha ka sngi Saitjaiñ ha ka Balang Presbyterian Umdihar.
Kane ka jingrakhe ïa ka taiew kyrpang ki Heprit ba la tip kum ka Children’s Week ne ka Children Sunday la rakhe ruh halor ka phang, “Na shyntur ki Khunlung bad kiba dang buiñ me la pynskhem ïa ka bor” ha kaba la pynshong Nongrim na ka Kitab Salm 8-2.
Kumba la pynpaw ka jingthmu ba la pynlong ïa kane ka taiew ki heprit, ka dei shi bynta banai ka jinghikai kaba paka sha ki Heprit la ka long haka jingim ba kynja mynsiem ne kiwei kiwei ki jaid jingïalehkai kiba long ka jingai mynsiem ïa ki heprit ba kin tip ïa kata ka lynti ïaid ha ka jingim jongki bad khamtam ba kin dang lah ban pynïajan ïa lade bad u Blei.
Ha katei ka sngi, nalor ka jingshim bynta ki heprit, la donrygnkat ruh u Tbn. R.R Makdoh, u Samla Isynei Hinge, u Tbn. R.B Shadap, u Tbn. SS Lapang bad kynthup ruh ki nongïalam ka ka CE Society Balang Presbyterian Umdihar bad ki kmie ki kpa jong ki.
Ha katei ka sngi, la ai jingkren ruh da u Tbn. R. R Makdoh, ha kaba u la ai ka jingkhublei kaba kyrpang ïa ka CE Society ka Balang Presbyterian Umdihar, kiba la pynlong ïa kane ka taiew kyrpang ki Heprit bad kum ki Heprit ki donkam ïa kum kine ki jingïakynduh lang ba kin ioh ïa ka seng ka khraw bad ba kin tip ruh ban ïaid ha ka lynti ba beit jong ka jingim ban lait na shibun ki jingsniew ha ki lynti ïaid jong ki kum kita ki heprit.
