Shillong, Nailar, 20: Ka Raid Mukertila Upper Primary School, ka skul kaba don ha Umsyiem ka shnong ha khappud bad ka ri Bangladesh, ha ka sngi Saitjaiñ ka la plie pyrda ïa ka jingrakhe Jubili Ksiar ne ka jingdap 50 snem ka jingshakri ïa ki paidbah ha ka pule puthi. Ïa katei ka jingrakhe la wan ban plie pyrda da ka MDC ka thain ba dei ruh ka Executive Member ka KHADC Kong Grace Kharpuri kum ka Kongsan ryngkat ka jingdonlang u Bah P Kongwang Sirdar ka Raid kum u Symbud Kongsan nalor u Rangbah Shnong Bah SL Kongwang, President ka Managing Commitee, Headmaster, ki nonghikai, ki Rangbah Shnong na ki shnong ba marjan kumjuh ki paidbah bad ki khynnah skul na katei ka shnong.
Ïa katei ka skul la sdang ha u snem 1973 bad katkum ka jingïathuh da ki nongpynïaid skul kumjuh da u Rangbah Shnong, ka skul ka la kiew arted da ka jingkylluid mynsiem ki nonghikai kiba ha ka tulop kaba rit ki la aiti met bad mynsiem. Kane ka jingrakhe ka dei ha ka snem ba ka shnong ka la kynjoh sha ka 107 snem. Shwa kane, u Rangbah Shnong u la pyntip ruh ba dei ha u snem 2020 ba ïa katei ka skul Upper Primary la kyntiew kyrdan noh sha ka Secondary bad ka sien ba nyngkong ba ki phah ïakhun ïa ka eksam SSLC kadei ha u snem 2021 bad mad ïa ka jingpass kaba palat 90persen.
“Nga ai khublei ïa ki nongshong shnong kiba la kyrshan borbah ïa ka skul da kaba noh kylluid mynsiem,” u la ong da kaba pynpaw ruh ka jingsngewnguh ïa ka MDC kaba la ju don syndah syndah ha ka jingdonkam ka shnong bad ka skul. U Symbud Kongsan pat u la ïathuh khana lyngkot shaphang ka jingseng ïa katei ka skul bad kumno ki poi ban seng ïa ka ha ki 50 snem mynshwa. Na ka liang ka Kongsan pat ha ka jingkren ka la ong ba 50 snem kim dei satia ki jingïaid lynti kiba suk ban pynïaid ïa ka skul. “Ngi ai burom kyrpang ïa ki nongseng ïa kane ka skul bad ñiewkor ïa ki da kaba buddien ïa ki dienjat jong ki,” ka la ong.
Ha kawei pat ka liang ka la ong ba kane kajuk mynta kadei ka shyrkhei bha namar kiba bun ki jingeh khamtam haba ki samla pule ki shah pynbiej ha ki jingsniew kiba harukom khamtam eh u drok. Katkum ka jingong jong ka, ka jingmih kitei ki jingdih ba shyrkhei ki pynkhia jingmut bad pynsyier pyntieng ïa ki kmie ki kpa kiba don ïa ki khun kiba dang khie dang san.
“Ka jingïaid lynti kum ka Kmie kam dei kaba suk ban peit ïa ki khun namar nga ïalade kum ka kmie bad kum ka nongmihkhmat nga sngewthuh ba kam dei satia ka kam kaba suk,” ka la ong da kaba khot ba wer ïa baroh ban ïakhun ryntih kawei ka buit kawei ka bor pyrshah ïa kitei ki jingdih ba sniew. La ïoh ruh ïa ka jingkren na u Headmaster, President ka managing committe, Rangbah shnong bad Secretary Shnong na ki nongïalam shnong na ki shnong ba marjan bad ruh ki jingrwai jingshad na ki khynnah skul jong ka Mukertila bad ruh na ka Umsyiem Government bad Lovely Garden English School.
