Rakhe ïa ka Azadi ka Amrit Mahotsav ha Amrit Sarovar Site ha Dirang bad ha Sakwang VEC

Mawkyrwat, ‘Nailar, 09: Kum shibynta jong ka jingrakhe ïa ka jingdap 75 snem ka jingïoh laitluid jong ka Ri India, ka ophis jong u Block Development Officer, Mawkyrwat bad Ranikor C&RD Block ki la pynlong ïa ka prokram kaba hap hapoh Azadi Ka Amrit Mahotsav halor ka phang “Mera Maati Mera Desh” harud ki ar tylli ki pung kata jong ka Dirang VEC bad ka Sakwang VEC, South West Khasi Hills District.
Ha ka jingrakhe ïa kane ka sngi hapoh shnong Dirang la long kongsan da u bah T. Lyngwa, IAS, Deputy Commissioner, South West Khasi Hills District uba ba plie ruh ïa u mot sah kynmaw jong ka jingshna ïa ka pung dohkha kaba T. 26 lak lyngba ka MGNREGS jong u snem 2022-23 katba ha shnong Sakwang pat la long kongsan da u bah L.T. Tariang, MCS, Additional Deputy Commissioner bad Project Director DRDA, South West Khasi Hills District uba la plie ïa u mot sah kynmaw jong u Sngap Sing Syiem, u Khlawait ka Hima Maharam.
U Bah T. Lyngwa haba kren ha kane ka sngi u la ïaroh ïa ka jingtrei shitom jong ki ophisar bad ki nongtrei kiba la leh shitom ban pynbit pynbiang ha kaba ïa dei bad ki jingdonkam ha kane ka sngi. U la ong ruh ba kane ka prokram ka long ka jingsdang ha ka ban plie ïa ki jingmut jingpyrkhat jong ngi kumno ban pynbha bad ban pyntyllun ïa ki kam nangne shakhmat. U la pynpaw ruh ïa ka jingdonkam ban ïoh ïa ki briew kiba don ka jingkitkhlieh bad kiba lah ban ai jingmut na ka bynta ban pynbha shuh shuh khnang ba ka lawei jong ki longdien kan phyrnai. “Wat hapdeng ka jingïabun paid bad ka jingïapher bad kiwei pat ki kynhun jaid bynriew hynrei ngi la ïa long kawei bad ngi la ïai neh haduh ban da kynjoh ïa u mawjam sha ka jingdap 75 snem jong ka Ri India”, ong u bah Lyngwa.
Ha kaba ïa dei bad ka jingpynlang ïa ka khyndew na baroh ki shnong kiba don ha baroh kawei ka Ri India, u la ong ba kum ka dak ban pyni ïa ka jingïalong kawei bad u la ïathuh ruh ba yn sa jied ïa ki khynnah ki ban leit mihkhmat na kane ka distrik sha Delhi. U kyrmen bad khmih lynti namarkata, ban kyntiew ïa kane ka jaka kaba ka mei mariang ka la buh kyrpang khnang ban khring ïa ki nongwan jngohkai pyrthei nangne sha khmat. U la kyntu ïa ki nongshong shnong ban sumar khuid bad ban pynneh pynsah ïa ka kynhun kaba ki don khnang ba kin lah ban leh bun kiei kiei ki kam ki ban ai jingmyntoi ïa ki ïing ki sem bad ia ka shnong ka thaw. U la pynpaw ïa ka jingkmen ban ïohi ba wat la ka shnong ka long kaba rit hynrei lyngba ka jingtip jingshem-phang bad lyngba ka jingïatylli kane ka shnong ka la roi bha ha baroh ki liang.
U bah Lyngwa u la bynrap shuh shuh ba lyngba kane ka prokram 100 sngi ki dang don bun kiei kiei kiba hap ban dang ïai trei nangne shakhmat ha ka ban pynitynnad bad pynbit pynbiang ïa kane ka pung khnang ba kan wanrah jingmyntoi ïa ki nongshong shnong lyngba ki nongwan peit kai. U la kyntu ïa ki nongshong shnong kiba na ki shnong kiba marjan ban trei shitom na ka bynta ban pynroi ïa ki shnong ki thaw bad ban peit ba ki jingsniew kin ym ïoh ban bsuh hapoh shnong poh thaw bad ba ki khun ki kti kin lait na ki jingmlien kiba sniew khnang ban lah ban pynneh pynsah ïa ka shongsuk shongsaiñ.
Katba ha ka jingkren u bah L.T. Tariang, MCS, Additional Deputy Commissioner bad Project Director DRDA, South West Khasi Hills District ha shnong Sakwang pat, u la ong ba la pynlong ïa kane ka prokram da ka jingthmu ban pynphriang ïa ka mynsiem ïaleh ha kylleng ka ri bad ha kajuh ka por ban pyntyllun ïa ki kam pynroi ha ka jingpyntreikam ïa ki skhim bapher ha baroh kawei ka distrik. U la ong ruh ba kane ka distrik ka la ïoh ïa ka Best Performance ne kaba la pyntreikam bha ha ka kaba ïadei bad ka skhim 100 sngi bad ka PMAY Skhim ha kaba kumba 30 tylli ki longïing kiba don ha Shnong Sakwang and Pynden-sakwang kiba hap hapoh Mawkyrwat C&RD Block ki la ïoh jingmyntoi shibun na ka PMAY Skhim bad kumba 20 hajar tyngka ha ka shisnem kawei kawei ka longïing ka la ïoh myntoi na ka MGNREGS.
Shuh shuh u la pyntip ruh ba ka Mawkyrwat C&RD Block la ithuh kum kawei na ki 5 tylli ki best performing C&RD Block kiba la trei shitom ha ka ban pyntyllun ïa kiwei ki skhim (Under Convergence) bad ka PMAY-G. Namarkata, ula pynsngewthuh ïa ka jingdonkam ban don ïa ka Aadhar Card khnang ban kin ym duh ïa ki jingïoh myntoi kiba wan na ka sorkar lyngba ki skhim bapher bapher. U la pynshlur bad kyntu ïa ki khynnah skul halor ka jingdonkam ban pynneh pynsah ïa ka mariang ha kaba ka donkam ïa iwei pa iwei ban shim ïa ka jingkitkhlieh na ka bynta ban tyngkai bad pynwandur ïa ka mei mariang.
Ban rakhe ïa kane ka sngi ba kyrpang la kyntiew ïa ka Lama jong ka Ri ryngkat ka jingrwai ïa ka National Anthem bad ka jingkham khyndew ha ka por ba pule ïa ka kot jingkular ne Pledge bad ka jingthung dieng ha baroh sawdong jong ki pung bad ka jingpyllait ïa ki dohkha.
Nalor ki jingkren jong ki kongsan, la ïoh ruh ki jingkren lyngkot na u bah Isagahah Lawryniang, BDO, Mawkyrwat C&RD Block bad kumjuh ruh na u bah S. Marweiñ, MCS, BDO C & RD Block, Ranikor.
Kham ha shwa u bah S. Kharjahrin, Myntri ka Shnong Sakwang u la ai ïa ka jingkren pdiang sngewbha katba u bah A. Kharjahrin, Secy. Sakwang VEC u la ai ïa ki kyntien khublei katba ha Dirang pat kiba ïa donlang ki long u bah L. Kynjing, SDO (C) Ranikor Civil Sub Division, u J. Singh, Assistant Commandant ka BSF, u bah D.D.Khardewsaw, Myntri Shnong Dirang bad kiwei de ki ophisar sorkar.
La pynshongkun shuh shuh ïa kane ka prokram da ka jingrwai ryngkat ka shad na ka Saindur Village Organisation jong ka Shnong Dirang.
Ïa ka jingïalang ha Dirang VEC la pynïaid da u bah T. Shyne, APO, Ranikor Block bad la ïoh ruh ïa ka jingkhublei na u bah P. Lyngdoh, APO, CL&IBP.