Nongpoh, Naiwieng 30 : Ka Nangshai Village Organisation kaba dei kawei naki kynhun jong ki longkmie haka shnong Saiden mynta ka sngi kala pynlong ïaka jingrakhe dap 1 snem jong ka kynhun naduh bala seng ïa ka ha u snem 2021.
La sakhi ruh ha katei ka sngi da u Bah Jason S Mawlong MLA ka Umsning kum u kongsan u Bah EK Lapang kum u symbud kongsan, Bah Succesfull Lyngdoh Rangbah Shnong haka jingdonlang ki nongïalam jong ka Nangshai VO bad kiwei ki riew rangbah.
Ha katei ka sngi ka jingrakhe ïa katei ka jingdap 1 snem la ioh ruh ban ot ïa u cake kum ka dak ka jinglehkmen dap shisnem jong ka jingïaid lynti da ka jingkyrmen ba katei ka VO kan bteng ban shakri ïaki kam ha katei ka shnong khamtam ban kyntiew ïaki para longkmie ban sengkam bad ban ïeng hala ki jong ki kjat lyngba ki SHG ba ki don.
Naka lïang u Bah Jason S Mawlong haba kren ha katei ka sngi u la ai mynsiem ïaki nongïalam ka VO bad ki SHGs bapher bapher ha katei ka sngi ba kin dang lah ban trei shitrhem kham bha shuh shuh naka bynta ka jingmyntoi jong ki longkmie bad kumjuh ban wanrah ki jingkylla haka shnong ka thaw hi baroh kawei, ba kin lah ban seng ïaki kam ki jam, ban ieng hala ki jong ki kjat bad kumjuh ban dang lah ban kner ïaki jingïarap sha kiwei pat ki para longkmie.
“Ki longkmie ki dei kita ki païa baskhem kiba don ka bynta kaba khraw ha kaban tei ïa ka longing kaba skhem, ka imlang ka sahlang kaba shngain bad ruh kiba shim ïa ka jingkitkhlieh ban ri ban sumar ïaka lawei ki khun ki kti” la pynpaw ki longkmie ha katei ka sngi da kaba bynrap ruh ba naduh bala thaw ïaka Village Organization shibun ki jingkylla kila wan haka shnong ka thaw.
Na ka liang ki Longkmie ki la pynpaw ruh ba ha ka lama ka Village Organization kn dang bteng ïa ka kam shakri bad ka jingangnud hi ka long ban wan rah ïa ka jingkylla bad ka jingmyntoi ki paidbah hapoh ka Shnong ka thaw, ki la bynrap.
