Khliehriat, Nailur, 22: Ka San Shnong Cluster Level Federation Multi-purpose Co-operative Society, East Jaiñtia Hills District mynta ka sngi ka la rakhe ïa ka jingdap shi snem bad la pynlong ïa ka jingialang ba kyrpang ha Dong Pyrdi Community Hall ha shnong Mukhaïalong, ha kaba u Deputy Commis-sioner ka East Jaiñtia Hills District, u A. Baranwal, IAS u la long kum u kongsan bad la ïa don ryngkat lang ruh u Block Development Officer, Wapung C&RD Block, u Dr T. Shylla, u Chief Operating Officer, Meghalaya State Rural Livelihoods Society (MSRLS), u bah R. Kynta, u President, Raid Tuber, u bah H. Phawa, u District Mission Manager, East Jaiñtia Hills District, u bah K. Slong, lem bad kiwei kiwei ki tnat sorkar ba kynthup ruh ki nongtrei jong ki bank, ki riew rangbah ka thaiñ, ki dkhot voluntary organization (VO), ki kynhun Self Help Group (SHG).
Haba kren kum u kongsan, u A. Baranwal, u la ong ba ki kynhun Self Help Group (SHGs) ki dei ruh shibynta bad ka kam khaiï pateng hapoh ka jylla bad ki kam jong ki SHG ki pyni ruh ïa ka jingpynkup bor ïa ki kynthei, kine ki SHG ki dei kiba ka sorkar ka la ïohi jngai ha kiba bun ki kam khamtam ha ki thaiñ nongkyndong bad ong ruh ba kane ka San Shnong Cluster Level Federation Co-operative Society ha ka jingiatreilang bad ki tnat sorkar bapher bapher kan sa nang kiew bad ki bor district ruh kin sa ai ki jingkyrshan ban dup lah ban pynurlong ïa ka jingthmu kumba ka sorkar ka thmu, u la kren ruh shaphang ka jingdonkam ban don ki jaka ai jinghikai (training centres) na ka bynta kine ki SHGs ban dup lah ban kyntiew ïa ki sap ki phong jong ki.
U Chief Operating Officer, Meghalaya State Rural Livelihood Society (MSRLS), u la kren shapahng ki kam jong ki SHG hapoh ka jylla Meghalaya kiba ha ka im lang ka sahlang, ki dei ki jingtrei ba la pyntreikam da ka NRLM ha Meghalaya ha u snem 2014, u la ong ba kine ki kynhun SHG ki la sdang ban kiew bad mynta ki la don haduh 45,000 ki kynhun SHGs, 5500 tylli ki Vos bad 87 tylli ki CLFs ha ka jylla Meghalaya.
U President, Seiñ Raid Tuber, u la ong ba ki SHG ki iarap shibun ha ka iohkam iohjam ha ki shnong kyndong bad kine ki SGH ki long ruh kum ki rynsan na ka bynta ki kynthei kiba don ïa ki sap ban shna ïa ki tiar da ki kti bad ruh ba kin ïa shimbynta ha ki rynsan lane ki prokram bapher bapher.
La pynitynnad shuh shuh ïa kane ka prokram da ki jingrwai bad jingshad na ki dkhot jong ka Seilung VO, Mukhaïalong bad ka Ïakyntulang VO, ka Pynthorsale. Ha kane ka sngi la sam ruh ïa ki khusnam sa ki Vos bad ki SHGs kiba hapoh ka CLF ha kaba ka kynhun Ïakyntulang VO ka la ioh khur ïa ka khusnam Best VO kaba la kot sha ka 100 percent bank linkage, kumjuh ruh ka kynhun Nangkiewshaphrang VO , ka la ioh ïa khusnam Best VO ha kaba iadei bad ki kam kiba kyntiew ïa ka koit ka khiah jong ki kynthei ki khynnah bad ka kynhun Ïaidchaphrang SHG ka la ioh ïa ka khusnam Best SHG halor ka jinglah ban pynbit pynbiang ïa ki jingkhein jingdiah. Ïa kane ka San Shnong Cluster Level Federation, la seng ha ka 22 tarik u nailur 2021 bad la sdang ïa kane ka kynhun da ki phra ngut ki dkhot ha ka VO bad 162 ki dkhot ha ka SHG.. Kiba la ai jingkreh ha kane ka jingïalang ki kynthup ruh ka President, San Shnong CLF, ka kong B. Dkhar, ka Secretary, San Shnong CLF, ka kong Nadona Dkhar bad ka Vice-President, San Shnong CLF, ka kong I. Phawa.
