Shillong, Ïaiong 11 : Ka skul Madan Hindi Pathshala Secondary School ha ka 10tarik mynta u bnai ka la rakhe ïa ka jingdap 57 snem ka jingshakri jong katei ka skul ïa ki nongshong shnong ka thaiñ ha ka pule puthi.
Ha kane ka sngi la donlang ruh u MLA/MDC ka thaiñ Bah Lambor Malngiang kum u Kongsan nalor ki nongmihkhmat na ka Gorkha Durga Puja Committee, Gorkha Mahila Samiti, Gorkha Shiv Mandir Committee, Ex-Serviceman Association, Gorkha Youth Association, ki riew rangbah bad kiwei kiwei.
La pynphuh shuh shuh ïa katei ka jingrakhe da ki prokram ba harukom kynthup naduh ki jingrwai bad jingshad tynrai jong ki Khasi, Garo, Nepali, Assemese, Mizo bad kiwei kiwei.
Katkum ka kyrwoh na u Secretary jong ka Managing Committee Dr. Krishna Chauhan, la ïathuh ruh ba ha kane ka sngi, u Kongsan u la sam ruh ïa ki khusnam sha kito ki samla pule kiba pass bha ha ka eksam Matrik.
U Kongsan u la kyntu ruh ïa ki khynnah skul ba lai maw lai dieng ki dei ban kiar na ki jingdih kiba sniew kiba lah ban ktah ym tang ïa ka lawei jong ki hynrei wat ïa ka ïing ka sem jong ki baroh kawei.
