Rakhe dap 3 snem ka Iasnohktilang VO, ai mynsiem ïa ki longkmie ban ïeng ha la ki jong ki kjat

Nongpoh, Risaw 01: Ka kynhun Iasnohktilang Village Organisation kaba kdup kumba 10 tylli ki SHG kaba don haka shnong Mawphrow ha Ri-Bhoi District, ka la rakhe kyrpang ban pynsah jingkynmaw halor ka jingdap kaba 3 snem jong ka jingïaid lynti ka kynhun naduh bala seng ïaka ha u snem 2019 da ka jingangnud ban kyntiew ïaki longkmie kaba dei ruh ka thong jong ka sorkar kmie.
Katei ka VO tang hapoh ka 3 snem jong ka jingïaid lynti ka la lah ban thaw haduh 10 tylli ki SHG hapoh jong ka, ban seng ïaka kynhun ki longkmie na ka bynta ba kin ïeng ha la ki kjat na ka bynta ban seng kam lajong bad haka jing ïaid lynti kaba 3 snem katei ka Village Organisation ka leh shibun ki kam ki ba bha bad ki kam shakri paidbah hapoh katei ka Shnong khamtam ban kyntiew ïaki para longkmie.
La ioh ruh ban ot ïa u cake ha katei ka sngi kum ka dak ka jinglehkmen ha kaba u MLA ka Nongpoh Constituency u Bah Mayral Born Syiem u la shim bynta kum u kongsan haka jingdon ryngkat u Bah A Dewkhait Gram Sevak, Joyfie Nongrum, CC Incharge, Sebastian Makri Rangbah Shnong Mawphrow, Kong Anjela Makri, President jong ka VO, bad ki Dkhot jong ki Self Help Groups.
Ha katei ka sngi naka liang u Bah Mayral Born Syiem u la plie paidbah ruh ïaka ophis treikam jong ka seng kaba la tei bad shna hi da katei ka VO naka bynta ban pynbit pynbiang bad ban pynïaid beit ïaki kam ki jam jong ka VO.