Jowai, Naiwieng 15 : Shi bynta na ka sngi kyrpang jong ki khynnah ne ka ‘Children’s Day’ ka Dorbar Shnong Loomkyrwiang, Jowai ha kane ka 14 tarik u Naiwieng kala rakhe ïa katei ka sngi ha Dorbar Hall jong ka Shnong haka jingdonlang ki longkmie bad ki longkpa.
Ïa ka jingïalang la pynïaid da u Daioolang Pakma, Symbood Waheh Shnong la ïoh ki kyntien pdiang burom na ka Heiyoomitre Pakma, Secretary Social Committee, ka jingnguhblei na u S.D. Laloo, General Secretary, katwa ka Wandaka Laloo, Secretary Education Committee kala ai jingkren halor kane ka sngi Children’s Day.
Ka phang jong kane ka jingrakhe mynta u snem ka ong “For Every Child-Every Right” na ka liang ka Wandaka Laloo kala pynsngew ïa ki saw tylli ki hok jong ki khynnah kata ka Hok ban im (Right to live), ka Hok ban ïoh jingnang jingstad (Right to education), ka Hok ban ïoh ka koit ka khiah (Right to health) bad ka Hok ban ïoh ïa ka bam kaba biang (Right to food).
Halor kane ka kyntu jur ïa ki kmie ki kpa bad ïa baroh kiba la heh la san ba kin shim ka jingkitkhlieh ban ri bad sumar bha ïa ki khynnah naduh dang rit bad ban ai jinghikai haka lynti kaba dei.
Shuh shuh kala pynsngew ba ka rukom im jong ki khynnah haba ïa nujor bad ki por mynswa kala ïapher bha khamtam khamtam ha kine ki por jong ka juk Mobile kaba pynlong ïa ka jingim kaba marwei bad kaba pynïajngai ïa ka jingïadei, ka jingïaieit bad ki para marjan kumjuh hapoh ka shnong ka thaw.
Na ka liang ka shnong kaba pynkmen bad pynsngewbha ïa ki khynnah da kaba sam ïa ki tiar, ki jingbam bad ka jingot ïa u Cake jong ka jingrakhe ïa ka sngi kyrpang ki khynnah.
