Shillong, Jymmang 26: U MP ba marwei ka Rajya Sabha u Dr WR Kharlukhi ha ka sngi nyngkong u la pynrem ïa ka National Green Tribunal (NGT) halor ka jingkynnoh ba ka la long “double standard” bad u la ong ba khlem pep un rah ïa kane kam ha parliament.
U Dr Kharlukhi, uba dei ruh u state president jong ka National People’s Party (NPP), u la kynnoh ïa ka NGT ba ka khlem shim kam halor ki kaiphod ba ïadei bad ka jingïap ki million ngut ki briew na ka daw ka jingjaboh kaba mih na ki karkhana kiba la ïohpang hynrei ka long pat kaba kloi ban pyrshah ïa ka jingjaboh ka sawdong sawkun.
“Ngan sa wanrah da ka zero hour notice ha parliament. Haoid ka NGT ka long pyrshah bha ïa ka kam tih dewïong beaiñ ha ka jylla, ki la behthong nadien jong ki briew jong ngi bad kane ka la ktah ïa kito ki nongtih par dewïong kiba rit. Hynrei kadei kaba pynkyndit ïa nga ka long ka khubor kaba la mih ha ka The Hindu ha kaba da ki million ngut ki briew ki la ïap na ka daw ka jingjaboh bad ki karkhana kiba heh, na kadaw ka jingbun ki karkhana kiba heh, ki briew ki la ïap. Kaei ba ka NGT ka la leh shaphang kane naba bun na ki metro ki la shah ktah da kane? Ngan rah ïa kane ka mat sha parliament naba kane sha nga ka dei ka double standard,” ong u MP ka Rajya Sabha sha ki lad pathai khubor.
“Ki briew jong ngi ki la shah ktah bha na ka daw ka jingkhang tih dewïong ka NGT kaba la pynjari ha u snem 2014 naba ka kam tih dewïong ka dei ka kamai jakpoh jong ki 40 snem hynrei kynsan kynsan la shu shah khang,” u la ong da kaba bynrap ba ym tang ba ka la ktah ka jingim jong ki hajar ngut ki briew hynrei ka la ktah ruh ïa ka jingïoh khajna jong ka jylla bad ki autonomous district councils (ADCs).
Haba kylli u Dr Kharlukhi u la ong, “Phi ïohi ba ka tih dewïong thliew khnai, kaei kaba ki ong, ka ktah ïa ka sawdong sawkun hynrei ka jingpynjaboh da ki karkhana kiba heh ki ktah ïa ka longbriew manbriew. Kumta hato ka jingim jong ki briew kam long kaba kongsan? Nga sngewba ka jingim jong ki briew ka long kaba donkam kumba long ka sawdong sawkun, kumta kaei kaba nga ong ka long ba ki dei ban leh ki kam wadbniah balei ka kam tih dewïong ka ktah ïa ki wah?”
Katkum ka jingong jong u, ki wah ki jaboh na ka daw ka jingbret bad pyntuid pathar ïa u dewïong bad kam dei satia na ka daw ki kam tih dewïong.
