Jowai, Risaw 25: Ka Kashari jong u Sessions Judge, Jowai u N. A Khan ka la rai pynrem ïa uwei u briew uba la tip kyrteng kum u Elias Siangshai, da kaba rai set phatok 15 snem kynthih ryngkat ka kuna.
Kane ka dei ka jingshim bishar ïa ka jingjia ha ka 15 tarik, Naiwieng, 2021, ha ka por 12:00 baje mynsngi ha kaba kawei ka samla kaba dang wan na Umpyrkit ka la shah leh be-ijot ha la kni jong ka u Elias Siangshai, uba la maham ruh ba kam dei ban iathuh iano iano ruh ïa ka kam pohjait ba u la la leh.
Hynrei ka samla ka la ujor da ka ejahar ha Nartiang Police Station bad ki Pulit ki la register case hapoh ka Section 376 (2) (f) bad 506 IPC bad la pynkhamti ha ka WPSI I. Dkhar ban pynlong ia ka jingtohkit.
Ha ka 16 tarik, Risaw, 2024, u Elias Siangshai ula shah rai pynrem ha ka Kashari bad u Nongbishar u la rai pynrem da kaba phah set phatok 15 snem kynthih bad dain kuna T. 5,000 hajar katkum ka kyndon 376 (1) (f), bad sa 5 snem ka jingset along bad ka kuna kaba T. 1,000 katkum ka kyndon 506 bynta-II.
Baroh ar tylli ki jingpynshitom kin ïaid ha kajuh ka por bad ka por set along kan long 12 snem, 2 taïew, 4 sngi naduh ka sngi ba la sdang ka jingshah set phatok.
