Rai ki nongtrei ka SSA ban bteng ïakhih shongkyllaiñ myngngor bym hun ka jingïakren
Shillong, Nailar 2 : Ki nongtrei SSA hapoh ka lama All Meghalaya SSA Non Teaching Staffs Association (AMSSANTS) kim sngewhun satia ïa ka jingïakren ka Rationalisation Committee mynta ka sngi Thohdieng bad kumta ki la rai ban bteng beit ka jingïakhih shongkyllaiñ myngngor tad haduh ba ka sorkar kan mynjur ïa ka jingdawa jongki ban pynkitew tulop 80 %.
“ Ngim shym la hun satia ïa ka jingïakynduh ka Committee mynta ka sngi namar ka jingïakren kam poi shano shano ruh. Ngim shym la ïakren ïa kiei kiba dei ban ïakren ruh ka shu long ka jingpynlut kai ïa ka por” ong ka President ka Seng ka kong Jennyfer J Synrem haba ïakren bad ki lad pathai khubor.
“ Kumta ngi la rai ban bteng beit ïa kane ka jingïakhih shong kyllaiñ myngngor kaba khlem buh por tad haduh ban da ïoh ïa ki jingdawa” ka la ong bad ïathuh artad ba ka jingïakynduh biang jongka Committee kan long ha ka Sngi Palei ban wan.
ïa ka jingthung ïa ki 20 ngut ki dkhot ka Committee ba la khlieh da u Commissioner bad Secretary u Vijay Kumar Mantri la aiti da u Myntri Rangbah sha ki dkhot ka AMSSANTSA naduh ka Sngi Palei hadien ka jingïakynduh bad u ha kamra treikam jongu.
Ki don palat 1200 ngut ki nongtrei ka SSA kiba ïakhih shong kyllai‰ myngngor ha madan Malki hadien ba ki la kyntait ïa ka jingtyrwa ka sorkar ban kyntiew tulop ïa ki da 25 %. Ki nongtrei SSA ki dawa ban pynkiew beit 80% lem bad ka 2 % ïa kito kiba la trei slem bad ban pynkiew pat 5 % man la u snem.
“ Ka nongrim ba ngi ïeng ka long ba lada ka sorkar kan rai kloi ngi ruh ngin bteng beit ïa ki jingïakhih kumta ka sorkar ka dei ban rai kloi khnang ba ngin ïoh leit phai kloi noh sha ïing namar ngi la kren shai ba ngim da kwah than ban ïakhih kumne” ong ka President.
Ki hynniew tylli ki mat kiba ka Committee ka dei ban leh ki long ban bishar bniah ïa baroh ki jingtyrwa halor ka jngdawa pynkiew tulop ki nongtrei SSA. Kane ka Committee ka dei ban bishar ïa ki tulop jong kiwei kiwei ki Society ha ka jylla, ban bishar ba ka jingsiew ka dei ban long ïa ryngkat naduh ka jyll, district bad block. Kane ka committee ka dei ruh ban bishar halor katei ka jingdawa ban kyntiew tulop man la u snem. Kan bishar ruh ia ka por shakri jong ki nongtrei naduh mynno ki sdang bad kiwei kiwei ki mat.