Rai ki ar jylla ban pyndep noh ka jingsieh mawpud ki 6 tylli ki jaka shwa ka sngi rakhe laitluid

Shillong, Jylliew 02: Ka Sorkar jylla Meghalaya bad Assam ki la mynjur ha ka jingïalang ha ka sngi Nyngkong ban pyndep noh ïa ka jingsieh mawpud ba thikna ha ki 6 tylli ki jaka ba la dep ïakren pynbeit, shuwa ka jingrakhe ïa ka Independence Day (ID) ne hapoh ka 15 tarik Nailar.
Ïa kane la pyntip da u Myntri Rangbah ka Jylla Conrad K Sangma hadien ka jingïalang bad u Myntri Rangbah ka Assam Himanta Biswa Sarma, kaba la long ha ka sngi Nyngkong ha Nongbah Guwahati.
Lah ban pynkynmaw ba kine ki 6 tylli ki jaka ki dei napdeng ki 12 tylli, kiba la dep ban ïapynbeit da ki artylli ki Jylla bad la dep ruh ban ïasoi ïa ka soskular MoU ha u bnai Lber 2022 hakhmat u Myntri Kam Pohïing ka Ri u Amit Shah, ha Nongbah Delhi.
Na ka liang u Myntri Rangbah ka Assam u Himanta Biswa Sarma haba kren sha ki lad pathai khubor ha ryngkat ka jingdonlang u Conrad Sangma u la ong, “Napdeng ki hynriew tylli ki jaka ba la dep ïasoi soskular, ngin pyrshang ban sieh mawpud noh ha ki 5 tylli ki jaka ha shuwa ka 15 tarik Nailar.”
“Ka don katto katne ka jingbym ïasngewthuh jingmut ha kawei na ki hynriew tylli ki jaka. Ka Meghalaya ka kwah ïa kawei ka shnong ba la ai sha nga ban pynphai pat hynrei kila ai ka jingkular ba kin sa ai bujli da kawei pat ka jaka kaba heh mar kumjuh. Ngi la pan por shi taïew ban shong pyrkhat bad sa pyntip sha ki,” la ong u Myntri Rangbah ka Assam.
U Himanta ula ong ba kane ka jaka ba dang don jingïapher jingmut ka dei ka thaiñ Pilingkata haba pyntip da kaba ong, “Ki Deputy Commissioner jong baroh artylli ki Jylla kin ïashong bad ïakren pynbeit ïa kane ka kam.”
Katba na ka liang u Conrad K Sangma ula ong ba ïa ki kam kiba rit ba ria la dep ban ïapynbeit lut bad mynta ka jingsieh ïa u mawpud ha ki san tylli ki jaka la khmih lynti ban dep ha shuwa ka Independence Day.
“Ka rai halor ka jingïakajia pud ba la ïapynbeit da ki bynta bynta, ka dei u mawmer uba khraw bha ha ka jingïadei hapdeng jong ngi,” ong u Conrad.
U Himanta ula pyntip ba ki ar Jylla ki la rai ban pynïaid shakhmat ïa ka jingïakren haba ïadei bad ki hynriew tylli ki jaka ba ïakajia ba dang sahteng hynrei ym pat shym la buh por lano ban pyndep ïa ka.
Ka Jylla Assam bad Meghalaya ki la don hapdeng ka jingïakajia pud kaba la slem bha ha ki 12 tylli ki jaka khappud ba heh kumba 884.9 sqkm.
Napdeng kane, haduh 36.79 sqkm ka jaka ba ïakajia la ïapynbeit ha ka wat ïakren khappud ba nyngkong, kaba long ha ki 6 tylli ki jaka. Ka Assam ka la ïoh 18.46 sqkm bad ka Meghalaya ka la ïoh 18.33 sqkm.
Ka kynhun na Meghalaya kiba la ïadonlang ha ka jingïalang ki kynthup ïa u Myntri ka tnad Jngohkai Bah Paul Lyngdoh bad u Chief Secretary Bah DP Wahlang bad kiwei kiwei ki heh Sorkar. Na ka liang pat la synran ïa u Myntri Rangbah u Himanta Biswa Sarma da ki Myntri Sorkar bad ki heh ophisar.