Rai ka sorkar pdeng ban pynhiar dor 200 tyngka ka tyndong lyer shet jingshet naduh 30 tarik

Shillong, Nailar 29 : Shuwa ban poi ka aiom tamasa, ka Sorkar Pdeng ka la rai ban pynhiar dor noh ïa ka tyndong lyer shet jingshet da T. 200 kawei ka tyndong (Cylinder) sha baroh ki nongpyndonkam tyndong lyer shet jingshet hapoh ka Ri bad kane kan treikam naduh ka 30 tarik mynta u bnai.
ïa kane ka rai la shim da ka jingïalang jong ka Kynhun Myntri ka Sorkar Pdeng ba long ha ka sngi Ba-ar hapoh ka jingialam u Myntri Rangbah duh ka ri u Narendra Modi bad la mynjur ïa ka hapoh ka skhim Ujjwala. Ka subsidy bynrap kan long T. 200 bad mynta ka subsidy baroh lang kan long T. 400 kawei ka tyndong na ka bynta ki nongïoh ia ka Pradhan Mantri Ujjwala Yojana (PMUY).
Kane ka rai ka la wan kum ka jinglait pynhiar mynsiem ïa ki longïing namar ka la rai ban khate ïa ka jingpynlut jong ki ba man la u bnai ha ka tyndong lyer shet jingshet.
Kumba long mynta, ka LPG cylinder ba 14.2 Kilo ka shongdor T. 1103 ha New Delhi. Kan sa hiar sha ka T. 903 naduh ka sngi Balang.
Ha kajuh ka rukom, ka dor kan long T. 703 ïa ki nongïoh ïa ka Ujjwala hadien ka jingbteng ka T.200 ka subsidy ïa kawei pa kawei ka tyndong.
U Myntri ka Sorkar Pdeng Anurag Thakur ula pyntip ba kane ka rai jong ka Sorkar Pdeng ka dei ka jingai sngewbha jong u Myntri Rangbah Duh ka Ri ïa ki paidbah, kum shibynta ka jinglehkmen Raksha Bandhan bad Onam.
U Thakur ula ong ruh ba ha u snem 2014, ha ka por ba ka BJP ka wan ha ka bor, tang 14.5 klur ki nongshong shnong ki don ïa ka LGP connection. Hynrei mynta ka la kiew sha ka 33 klur ha kaba 9.6 klur ki dei kiba ïoh na ka Ujjwala scheme.