Rai ka Sorkar ban buh da ki bording jingshai naduh Hotel Assembly, Urkaliar bad Polo

Shillong, Naitung, 13: Ka Sorkar Jylla ha ka jingbishar kam ha ka sngi Palei halor ka jingthud jong ka shongsuk shongsaiñ ha nongbah Shillong, ka la rai ban buh da ki bording ki ban pynthaba jingshai ïa ka surok naduh ka Hotel Assembly ter ter shaduh Ward’s Lake, ha Urkaliar bad ha ka thaiñ Polo.
Ka Sorkar ka la shim ïa kane ka rai ha ka jingïalang ba la pynïaid da u Symbud Myntri Rangbah uba peit ïa ka tnat Kam Pohing Bah Prestone Tynsong.
“Ngi la bishar bniah ïa ki lai tylli ki jaka ba ngi hap ban pynkhlaiñ ïa ka jingpahara. Ka jingplie ïa ki dukan ha kine ki jaka yn pyrkhing naduh ka por 11:30 baje mynmiet,” ong u Bah Prestone ha ka jingïakren bad ki lad pathai khubor.
Ki lai tylli ki jaka ki kynthup naduh Hotel Assembly shaduh Wards Lake ter ter na ka surok Oakland, ka bynta jong ka thaiñ Polo, ka Urkaliar, ka surok Quinton bad naduh Eee Cee Restaurant haduh Jail Road Petrol Pump.
“Ïa kine ki jingbthah la aiti sha ki bor synshar distrik bad sha u IGP ban pynkhlaiñ bad ban pynthikna ba kine ki jaka ki dei ban long kiba shngaiñ ïa ki nongleit nongwan,” u la ong.
Ha kaba ïadei bad kane, ka Sorkar ka la pynkylla noh ïa ka hukum ba pyrkhing ïa ka jingplie dukan, ki dukan die jingbam, ki restaurant bad ki Enterprise haduh 10 baje mynmiet ha baroh kawei nongbah Shillong. Hynrei, mynta ka sngi, la rai ban pynkylla noh ïa ka hukum kaba pyrkhing ban plie ïa ki dukan ha kine ki lai tylli ki jaka naduh ka por 11:30 baje mynmiet.Kane ka rai, ka long ruh hadien ba ka la mih ka jingpyrshah ïa ka hukum na kiba bun balang, kynthup na u Myntri ka tnat Jngohkai Pyrthei u Bah Paul Lyngdoh hadien ba ki bor synshar district ki la pyrkhing ban plie ïa ki dukan tang haduh ka por 10:00 baje mynmiet.
Ki nongdie dukan ki la kynthoh ruh ïa ka rai jong ka Sorkar kaba la pynjari da ka Section 144 CrPC ha nongbah Shillong na ka daw ka jingmih ki huri hura bad ka jingïakajia hapdeng ki ar kynhun kaba lam sha ka jingshah wiang ding jong ki kali Pulit ha Laitumkhrah Police Station.
U Bah Prestone u la ong ba ka nongbah Shillong ka don beit hapdeng ka shongsuk shongsain hynrei watla katta ka Sorkar ka ju peitngor ïa kino kino ki jingjia hangne hangtai kiba rit baria.
U la pynthikna ba ka tnat Pulit ryngkat bad ki bor synshar distrik kin peitngor ban wanrah ïa ka shongsuk shongsaiñ bad ïa ka jingshngaiñ jong ki nongshong shnong bad kumjuh ruh ïa ki nong jngohkai pyrthei kiba wan sha ka Jylla.
Shuh shuh u Symbud Myntri Rangbah u la ïathuh ba ka Sorkar ka la rai ban pynkhlaiñ ïa ka tnat Pulit ha ka jylla. “Ngi la rai ban pynkhlaiñ ïa ka tnat Pulit kan long noh shen. Kane kan pynthikna ba ki paidbah kiba sah ha Shillong bad ki nongwan jngohkai pyrthei lane mano mano kiba wan sha Meghalaya kin sngewshngaiñ bad ki lah ban bam ha kano kano ka jaka kaba ki mon,”u la ong.
Haba kylli, u Bah Prestone u la ïathuh ba ka jingduna nongtrei ha ka tnat Pulit ka long haduh 2000 hajar ngut. “Namarkata ngi la shim ïa ka rai ban pyndap noh mardor ïa ki kam kiba thylli,” ula bynrap.
U la ong ba ka Sorkar ka la pyndep ïa ka jingpynrungkam ha kaba da ki hajar ngut tam ki shithi thungkam yn sa pyllait noh mardor hapoh une u bnai. Ka wat kaba ar jong ka thungkam na ka bynta ki 1500-1600 tylli ki post yn sa pynsdang noh shen. Ha kaba ïadei bad ka jingshah kawang maw dang shen ka ing jong ka Myntri Sorkar ka Dr. Ampareen Lyngdoh, u Bah Prestone, u la ong, “la ka dei ka jingjia ha Police Station lane ka jingjia ha ing ka Myntri Sorkar, ka aiñ kan sa leh la ka jong ka kamram bad ngin ym ailad kum kine ki jingjia ba kin dang jia biang sa shisien.”
“Kam mut ba tang namarba ka don ka jingjia ha ïing jong ka Myntri Sorkar lane ha ha kano kano ka Police Station ka don ka jingbym shongsuk shongsaiñ. Kano kano hi ka jingjia kaba jia ha ka por shiteng miet ha kaba ki briew ki bym lah ban ithuh durkhmat kin thang ïa ki kali jong ki Pulit bad u briew, uba lehse u lah ban dei uba don jingpang ha ka bor pyrkhat un leit kawang maw ïa ka iing jong ka Myntri, hynrei kaei kaba jia ka long ba ki Pulit ki ladep kem ïa u bad ka jingtohkit ka dang ïaid shakhmat bad ngin sa peit kaei kaba donkam ban leh,” u la bynrap.
U Symbud Myntri Rangbah shuh shuh u la ïathuh ba ki Pulit ki la leh la kamram ban kem ïa ki briew kiba donkti ban thang ïa ki kali Pulit ha Laitumkhrah Police Station.