Rai ka Elaka Sumer ban pyndait da ki nar ha jingkieng Rimanar

Khliehriat, Rymphang, 13: Na ka por sha ka por ki paidbah jong ka Elaka sumer, East Jaiñtia Hills District, ki la ju pynpaw ka jingsngew khia namar ka jingiaid ki kali kiba kit palat pud kiba ju iaid lyngba na ka jingkieng Rimanar, ki la ong ruh ba kane ka jingkit palat pud ki kali hehe kan sa wanrah ïa ka jingjot bad jingjulor ka jingkieng kaba la synjor lypa ka bym iahap ruh ban iaid ki kali kiba ki palat pud.
Ha ka jingïalang ba la pynlong mynta ka sngi ha jan katei ka jingkieng Rimanar, ki paidbah da kawei ka sur ki la shim ïa ka rai ba naduh lashai ka sngi kin welding noh da ki nar ban khanglad noh ïa ki kali kiba ju kit palatpud khamtam ki kali kiba kit dewiong beaiñ kiba ju iaid lyngba na kane ka jingkieng “Kum ban shu pynkynmaw ba dang myn ha ka 20 tarik u kyllalyngkot ruh ka sur jong ki paidbah ka bri Sumer ka la dep ban buh da ka jingthoh hakhmat u Executive Enginner jong ka pwd NEC khliehriat bad ai copy cha u Deputy Commissioner jong ka East Jaiñtia hills district ha kaba ngi la kyrpad ïa ki ban leh ei ei bad ban shim khia ïa ka ne ka kam kaba ap jingma ïa ki paitbah nongleit nongwan kiba iaid lyngba na kane ka jingkieng, hynrei na ka liang ki bor ba dei khmih ki sngap jar jar halor kane katba ki kali dumper kiba kit dewiong ki iaid sahuh na kane ka jingkieng khlem patiaw ei ei, ngi buh ka jingkylli ïa ki bor ba dei peit bad ki ia ki bor district ba balei kim sngap lem ïa ka sur ki paidbah, imat don ei ei sha lyndet bad kine ki heh spah kiba kit dewiong beaiñ, lada Jia ei ei ïa ki paitbah mano ban bah khlieh, hato u DC u nud ban ong ba um tip ba don ki ba tih dewiong beaiñ? haba ka jingthoh ngi la dep ai copy sha u ruh, kine ki dei ki dak ki shin ba ki ibeiñ ïa ki paidbah ba duk ba shipa, ha kajuh ka por, ngi phah ïa ka ne ka kyrwoh sha kito ki heh spah, ki riew shim kabu, kynmaw ba ka por kan sa poi ba phin babe bad wat sngew kat ma nga,nalor ka kit ne tih dewiong tuh bad ka leh baheh bad lada jia ei ei ïa ki paitbah ba leit ba wan phin shim ka jing bah khlieh” pynpaw ka sur u paidbah ka Bri Sumer lyngba u bah Albinus Lamurong.
Kum ban shu pai dien, u bah Albinus Lamurong, myn ha ka 23 tarik u kyllalyngkot u la leit ban buh da ka ujor ha ophis jong u Assiatant Engineer jong ka tnat PWD Roads Sutnga Sub Division ha kaba u la ujor halor ka jingiaid ki trok kit dewïong kiba kit palat pud kiba iaid na ka jingkieng Rimanar, kaba don hajan ka shnong Samasi, kaba dei ka jingkieng kaba la pyntreikam da ka hukum 144 CrPC naduh u snem 2018 namar katei ka jingkieng ka la rim bad sator bha kaba la donkam ban iada.
Katkum ka shithi ujor, u bah Albinus Lamurong, u la ong ba lada ka jingkit palat pud ki trok ka dang bteng kan buh jingma ïa katei ka jingkieng kaba la sator bad ong ruh ba wat ki padbah jong ka thaiñ Sumer ruh ki syier mynsiem ban ïaid lyngba na kane ka jingkieng namar ba ka la rim bad ka la synjor shaba palat, u la kynthoh ruh ba dei namar ka jingleh khlemakor jong ki katto katne ki heh spah kiba pyn kit palat pud khlem da burom shuh ïa ka jingbthah kaba wan na ka ophis ne ka tnat sorkar, ha ka jingshisha na ka liang ka tnat ba dei peit ka la dep mana ban kit palat pud bad bthah ruh ba dei ban kit tang 9 mt ym ban kit palat pud.
U bah Lamurong, u la ong ba lyngba ka sur kaba na ka thaiñ Sumer, u la kyrpad ïa ka tnat PWS Sutnga Su-Division ba kan shim khia ban tehlakam noh mar mar ïa ki kali kiba kit palat pud, kaba dei ka jingleh jong ki riew shim kabu khnang ban lait na kano kano ka jingjia ba sngewsih ïa ki paidbah ba lui lui jong ka thaiñ.