Shillong, Nohprah 11 : Ka jingïalang jong ka Executive Committee jong ka KHADC ha ka sngi Balang ka la shim ïa ka rai ban rah hapoh Iing Dorbar halor ka ishu kaba ïadei bad ka mat jingdawa jong ki 21 shnong na Rambrai constituency ban wallam biang ïa ki sha Mawshynrut constituency.
Haba kren bad ki lad pathai khubor, u Deputy CEM ba dei peit ïa ka tnad Elaka, Bah Pynshngaiñ N Syiem u la ong, “Mynta ka sngi na ka liang ka Executive Committee ngi la shim ïa ka rai ban rah ha ka Dorbar Tlang kaban sa long shen bad kan sa shong pat ha ka jingsngew jong ka Dorbar.”
Nalorkata, u ïathuh ruh ba ka don kawei ka shnong ha Mairang constituency baroh shi katta hynrei ki paidbah ki kwah ban wanphai biang sha Sohiong.
“Ïa kine ngi la kynthup lang ha kane ka amendment kaba ngi tyrwa bad mynta ka sngi na ka liang ka EC ngi la mynjur bad ngin sa rah ha kane ka Dorbar,” u la bynrap biang.
U Deputy CEM u la ïathuh ruh ba ki don kiwei kiwei ki Bill kiba ki dang peit mynta kum ka Mawïang Syiemship, ka Nongjri bad kumjuh ka Sohbar ha kaba ïa kine ruh kin pyrshang ban pyndep kloi katba lah khnang ba lada lah ban pyndep kin lah ban wanrah ha kane ka Dorbar Tlang.
