Rah u Bah Mandilost Nongbri, Banlamphang Marboh bad ka Chelsea Byrsat ïa ka nam lahduh
Kut noh ka ïakop ñiah kali 4th AHOR 4X4 off Road Challenge ha Kharsati Park

Nongpoh, Risaw 09 : Ka lympung ïakop pynher kali haki surok ktieh bad ki khohruh khohram bala tip kum ka 4th AHOR 4X4 Off Road Challenge 2022 bala pynlong da ka Adventurous Hynniewtrep Off Roaders (AHOR) kala kut noh mynta ka sngi ha Kharsati Park, Umtham ha Ri Bhoi hadien ba ki nongñiah kali na kylleng ka Ri Khasi bad Jaiñtia bad wat na Jylla Assam kila wan ban shim bynta shitrhem ha katei ka lympung.
Ïa katei ka lympung la wan ban pynhap pyrda noh da u Bah Kyrmen Shylla Myntri ka tnad Social Welfare ka jylla kum u kongsan, haka jingdonlang u Bah Sunshine Makri uwei naki samla rangbah ka thaiñ Umsning kum u symbud kongsan, u Damian Umdor President ka AHOR, Bah Rayonald Kharkamni bad kiwei kiwei ki riew rangbah.
Kum ban shu pynpaw katei ka lympung ka dei kaba ju pynlong man u snem kum ka jingpynbyrngia ïaki nongpeit kai bad kumjuh ruh kawei naki jait jinglehkai ban pyni nam ïaka sap ñiah kali ba ki samla naka jylla ki don, khamtam haki surok khlaw kiba ktieh bad khohruh khohram, wat ban kiew ïaki dieng ki maw, hynrei ïa katei ka lympung la pynsangeh mynta la kumba 2 snem hadien ka jingwan lyngshop ka khlam Covid-19 bad kaba la sdang biang mynta u snem hapdeng ka jingiphuh iphieng bad shongshit bala wan ruh ban sakhi da ki hajar ngut ki nongpeit kai na kylleng ki jaka wat nabar jylla.
La sakhi ruh ba ha katei ka jingïakop ñiah kali ka long shisha kaba eh namar ka lynti ïaid kaba jwat ba hap ban thom ïaki dieng ki maw, hynrei ki nongñiah kila pyni shisha ïaka sap ñiah kali wat hapdeng ka jingther jong u lapbah ban pyndep ïa katei ka jingïakop.
Haba kren sha ki lad pathai khubor katto katne ngut ki samla kiba shim bynta ha katei ka lympung naduh ki kynthei bad ki shynrang kila pynpaw ba katei ka jingïakop ka long shisha kaba sngewtynnad ha kaba ki ioh shibun ki jinghikai ha kaba ïadei bad ka rukom ñiah kali khamtam ban ïakop haki surok khohruh khohram, bad khmih lynti haki snem ban wan kin dang don shuh shuh kiba nongñiah ki ban sa mih pyrthei bad ruh ba kin dang pynkhreh ïa katei ka lympung ha u snem ban wan.
U Bah Kyrmen Shylla kum u kongsan haba kren ha katei ka sngi u la ai ka jingïaroh ïaki nongïalam jong ka kynhun AHOR kiba la shim ïaka sienjam ban pynlong kum katei ka lympung da ka jingangnud ban pynpaw pyrthei ïaki sap ñiah kali jong ki khun samla ha ka jylla haki surok khohruh khohram, kaba dei kawei naki jait jinglehkai ba ju ïaleh shabar jylla bad wat shabar ka Ri.
U la ong ruh kum uwei naki khun samla ba ju ïeid ban ñiah kali u la kwah ban shim bynta ha katei ka lympung hynrei namar ka jingbunkam kum u Myntri um shym la lah ban leit shim bynta da ka jingkyrmen ruh ba haki snem ban wan un lah ban leit shim bynta ha kum katei ka lympung hakajuh ka por ban ai mynsiem ïaki khun samla.
Naka liang u Bah Kyrmen Shylla kum u Kongsan bad u Bah Sunshine Makri kum u symbud kongsan ha katei ka sngi kila aiti ruh da ka song pisa sha ka kynhun AHOR bad khmih lynti ba katei ka jingïakop kan dang bteng man u snem naka bynta ban sei ïaka sap ñiah kali bad lehse ki ban sa mih ruh ban leit ïakhun wat shabar jylla ha kum kitei ki jait jingïakop.
Ka kynhun AHOR kum ka jingai mynsiem ïaki nongñiah kali kiba shim bynta bad kiba la jop ha katei ka lympung kala sam ruh ïaki khusnam sha ki nongjop ha katei ka jingïakop ha kaba u Bah Mandilost Nongbri u la ioh ban rah ïaka nam lahduh haka Modified Category bad khur ruh ïaka song pisa kaba T.70 hajar lem bad ka trophy, u Ralph Lyngdoh Nongpiur 1st Runners Up bad u Sandy Cliff Marbaniang ha ka kyrdan 2nd Runners Up.
Katba ha ka Stock Category u Samla Banlamphang Marboh u la ioh ban rah ïaka nam lahduh bad khur ruh ïaka song pisa kaba T.25 hajar lem bad ka trophy, u Sunny B Nongrum haka kyrdan 1st Runners Up, bad u Daiaineh Paliar haka kyrdan 2nd Runners Up, katba haka Female Category ka Chelsea Byrsat haka kyrdan ba nyngkong, ka Febronia Effie Pajat haka kyrdan 1st Runners Up bad ka Lambhadaka Patlong haka kyrdan 2nd Runners Up.