Mawkyrwat, Jymmang 21: Ka Kenbah Youth Welfare Organisation hadien ba la ka pynliem noh ïa ka Iatyllilang Football Club ka la long ka lahduh ha ka lympung ïalehkai ba la tip kum ka Invitation Football Tournament 2025 ba la pynïaid da ka Phlangwanbroi Sport Club ha shnong Lawbah, East Khasi Hills District.
Ka jingrah jong ka Kenbah Youth Welfare Organisation ïa ka nam lahduh ka dei lyngba ka jingïoh ban thep da 4 – 3 kol pyrshah ïa ka Iatyllilang Football Club ha ka jingïakhuh ha ka Tie Breaker namar ha ki 90 minit jong ka jingïalehkai kine ki ar kynhun ki ka ïa khaid mar shi kol.
Ha sngi ban pynkut ne pynhap pyrda ïa kane ka lympung ïalehkai, u bah Olansing Suin uba dei u MLA jong ka Mawsynram Constituency u la long kum u kongsan bad u bah K. Nongbsaw, Executive Engineer ka PHE Mawkyrwat Division kum u symbud kongsan.
Haba ai jingkren kum u kongsan, u bah Olansing Suin ula ong ba ka jingïalehkai ka long kawei na ki lad ban pynïoh ha ki ïa ka met kaba koit ba khiah bad ym tang kata lyngba ka jingpynmlieh ha ki kam ïalehkai ka pyllait ruh na shibun ki jingmlien kiba sinew. Namarkata, u la ai ki kyntien kyntu kynpham ryngkat ka jingaimynsiem ïa ki samla ba kin pyndonkam hok ïa ka sap ba ki ki don.
Kiwei de kiba la donlang ki long ki Rangbah na ki san tylli ki Shnong hapoh jong ka Hima Malai Sohmat bad ki nongïalam Sengbhalang bapher.
