Rah nam lahduh ka Friends United FC ha ka Bataw Knockout FT, khung ïa ka khusnam pisa ba T.2lak

Khliehriat, Lber 24: Ka Friends United Football Club ka la ioh rah ïa ka nam lahduh ha ka lympung ïalehkai jong ka 3rd RYC Bataw Knockout Football Tournament 2025 ba la pynlong ha shnong Bataw, East Jaiñtia Hills District.
Ha katei ka jingiakhun final, ka Friends United Football Club ka la jop da kaba ïa shut tiebreaker da 4-1 kol pyrshah ïa ka Lakadong Rising United Football Club, ha ka jingiakhun u samla Refill Syndai uba na ka Friends United Football Club, u la ioh thep ïa ka kol bad u Raplang Lyngdoh uba na ka Lakadong Rising United Football Club, u la ioh pynphai shi kol, hapdeng ka jingialehkai kaba ïa ryngkat bor, ki ioh mar shi kol bad ka jingialehkai ka kut da kaba ïa shut tie breaker.
Ka Friends United Football Club, kaba la rah ïa kaba la rah ïa ka nam jop ka la rah ruh ïa ka khung pisa kaba T 2 lak tyngka lem bad ka trophy katba ka Lakadong Rising United Football Club, ka la rah ïa ka khung pisa kaba T 1 lak tyngka lem bad ka trophy.
Ha katei ka lympung ialehkai football, ka 3rd RYC Bataw Knockout Football Tournament 2025 ki la don haduh 16 tylli ki team kiba la wan ban iashim bynta bad u bah Forme Suchen uba na ka Shnong Suchen Lumiaraiñ, u la wan long kum u kongsan ha ka jaka jong u MLA, u bah Kyrmen Shylla bad ïa ka prokram ha ka lympung la pyniaid da u General Secretary Jong ka Rumshnong Youth Club Bataw, u bah Ampli Rupsi.