Kyrmen u Marquez ban sdang ïa ka Asian Cup Qualifiers ha Shillong da ka jingjop

Shillong, Lber 24: Ka kynhun ïalehkai phutbol ki shynrang jong ka ri India kan sdang ïa ka jingïaid lynti jong ka ha ka wat ba khatduh (Final Round) jong ka AFC Asian Cup 2027 Qualifiers pyrshah ïa ka Bangladesh ha Jawaharlal Nehru Stadium, kaba ha Shillong mynta ka sngi Ba ar (25 tarik Lber, 2025). ïa kane ka jingïalehkai yn pyni live ha JioHotstar bad ruh ha Star Sports 3.
Ki ar tylli kiwei pat ki kynhun kiba don ha ka Group A, kata ka Singapore bad ka Hong Kong, kin ïa aireng pyrshah mynta ka sngi Ba ar. Namar ba tang ka lahduh jong ka Group kan ïohrung sha katei ka lympung ha Saudi Arabia, ka jingïakhun kan long kaba itynnat, ha kaba u Manolo Marquez u la pynïaryngkat ïa kane ka jingïakhun ïaknieh rung kum ki ‘hynriew tylli ki final’.
“Ka jingïalehkai kaba nyngkong ka long barabor kaba kongsan. Ka long ka lympung kaba lyngkot, tang ki kynhun ba wan hakhlieh duh kin ïohrung na bynta ka lympung,” la ong u Marquez ha ka jingïalang bad ki lad pathai khubor ha ka sngi Nyngkong.
“Ki don hynriew tylli ki jingïalehkai bad Ngi donkam ban pyndep hakhmat. Ngi kwah ban ïoh ïa ki point kiba bun tam katba lah ban ïoh rung sha Saudi Arabia (AFC Asian Cup 2027).” u la bynrap.
Kum ka jingpynkhreh na bynta ka jingïakhun kaba kongsan tam, ka India ka la ïakhun pyrshah ïa ka Maldives ha ka sngi Balang ba la dep, ha kaba ka la jop suk da 3-0 kol, bad u Marquez u la ïoh ïa ka jingjop kaba nyngkong eh kum u coach jong ka kynhun India. ïa kitei ki lai kol la thep da u Rahul Bheke, Liston Colaco, bad u Sunil Chhetri, uba la wanphai biang ha ka kynhun bad ban pynkhih ïa ka kol kaba 95 na bynta ka ri.
Haba kren halor ka jingwanphai u Chhetri bad pynkhihjar biang, u Marquez u la ong, “U Sunil u dei u nongïalehkai phutbol ba pawnam jong ka ri India bad u dei u snar thep kol ba bun kol tam jong ka ri ha kane ka samoi. Ngi la don jingeh ban thep kol ha ki khyndiat tylli ki jingïalehkai ba nyngkong jong Nga, hynrei Ngim shym la duna ha ka ban thaw ïa ki lad. Nga sngew ba u long u rangïalehkai uba biang ïa Ngi.”
U rangïalehkai ba shadien, u Sandesh Jhingan, uba la synran ïa u Marquez ha ka jingïalang, u la bynrap, “Barabor…Ngi ju khmihlynti ba un thep kol. U la ïoh 95 tylli ïa ki (kol). Ngi sngew kmen ban don biang ïa u. Da ka jinglong kyrpang kaba u don, u long ka jingma ïa man la ki kynhun, ym tang ïa ka Bangladesh.
“Ngi pynleit jingmut ha kaba ïoh ïa ka resol ka jong Ngi. Lada phi la pynkhreh thikna, phi lah ban pynliem ïa kano kano ka kynhun, bad lade em, kino kino ki kynhun ki lah ban pynliem ïa phi. Ngi jam sha man la ki jingïalehkai da ka jingkyrmen kaba bha,” la bynrap biang utei u rangapdien ba 31-snem.
Wat hapdeng ka jingïapher kaba heh hapdeng ka India (126) bad ka Bangladesh (185) ha ka kyrdan jong ka FIFA, u Marquez u la pynpaw ba ka kyrdan kam dei kaba kdew ïa ka jinglong jong ka kynhun, bad ka jingpynrung ïa u rangïalehkai pdeng u Hamza Choudhury kan nang pynkhlaiñ shuh shuh ïa ka Bengal Tigers (Bangladesh).
“Ka Bangladesh ka don ki rangïalehkai kiba tbit bha. Ki la don ïa u juh u coach (Javier Cabrera) ha kine ki lai snem ba la dep da ka juh ka jingmut jingpyrkhat. Bun naki rangïalehkai ki dei ki juh naduh ba ki ïalehkai pyrshah ïa ka Maldives ha u Naiwieng jong u snem ba la dep. Ka jingpynneh ïa ka kynhun ka long kaba kongsan.
“Ka paw shai ba u Hamza, u dei u rangïalehkai uba tbit bha uba dang ïalehkai ha ka Premier League. Nga tharai ba ka long kaba bha ym tang ïa ka Bangladesh, hynrei ïa ka phutbol ha Asia ba kum kine ki player ki ïalehkai na bynta ka kynhun ïalehkai ka ri. Nga sngew ba ki paralok kin ïoh mynsiem shibun ban ïalehkai ryngkat bad u.
“Barabor, Ngi khmihlynti ïa ka jingïakhun kaba bha na ka liang pyrshah. Ka rukom leh jong Ngi ha man la ka jingïakhun ka long kumjuh, lada dei mano mano ruh – Maldives, Bangladesh, Hong Kong lane ka Singapore. Phi donkam ban tip ïa kiei kiei kiba bha bad kiba duna shaphang jong ki. Hynrei Ngim lah ban pynkylla ïa ka rukom lehkai jong Ngi. Ngi tip ba lada Ngi ïalehkai bha, Ngin sa jop lashai ka sngi (mynta ka sngi Ba Ar),” la ong u Marquez.
U Head Coach jong ka Bangladesh, u Javier Cabrera, uba na ri Spain kum u Marquez, u la pynpaw “Nga tharai kan long ka jingïalehkai kaba itynnat bha. Da shisha, ka kynhun ka la kilanmet bad trei shitom la 24 sngi mynta, kaba long ka por kaba jrong. Ngi sngewskhem, kham khlaiñ ban ïa kaba mynshuwa, bad khmihlynti ïa ka jingïakhun kaba ïakhaid. Kyrmen ba Ngin pynlong ïa kiei kiei kiba jwat bha ïa ka ri India.”
U rangïalehkai pdeng bad kapten jong ka Bangladesh, u Jamal Bhuyan, uba la ïalehkai mynshwa na ka Mohammedan Sporting haka I-League, u la ong, “Ka long kaba sngewtynnat ban wan biang ha India. Nga don ki por kiba sah jingkynmaw kiba sngewtynnat hangne, te, ho-oid, Nga sngew kyndeh bha ïa ka jingïakhun lashai ka sngi. Ngi tip ba kan long kaba jwat, hynrei Ngin ïa kaba bha tam.”