Jowai, Risaw 02: Ka kynhun ïalehkai jong ka Chutwakhu kala long syndon ka lahduh haka lympung ïalehkai phutbol bala tip kum ka 6th Debo Shullai Memorial Trophy jong ka kyrdan 2nd Division Football Tournament 2023 bala pynïaid da ka West Jaiñtia District Sports Association (WJDSA) kaba la long ha madan Kiang Nangbah Stadium, Dongmihsngi Jowai.
Ïa kane ka nam lahduh jong ka Chutwakhu kala wan hadien ba ka lah ban pynliem ïa ka Mooknor Thadmuthlong haka jingïakhun phainal mynta ka sngi nyngkong bad la sakhi ba ka jingïakhun hapdeng kine ki ar kynhun kala long kaba ïakhaid bha.
Haba phai sha ka jingïakhun Final ka Chutwakhu kala lah ban pynliem da 1-0 kol ïaka Mooknor Thadmuthlong bad ïa katei ka shikol naka Chutwakhu la thep da u Luckyness Khyriem haka minit ba 9.
Ïa ka nam Man Of the Match la ïoh da u Luckyness Khyriem naka Chutwakhu, Best Goal Keeper la ïoh da u Lalmalsawma Tariang ka Chutwakhu, Top Scorer la ïoh da u Chanmitre Dkhar jong ka Lion Sports and Youth Affairs uba la theh haduh 6 kol. Katba ïa ka nam Player of the Tournament la ïoh da u Luckyness Khyriem jong ka Chutwakhu.
