Shillong, Nailar 20: Ka Shillong Sports Association hynnin ka Sngi Saitjaiñ jong ka taïew ba ladep ka la ïoh ban pynkut noh ïa ka lympung lehkai phutbol jong ki khynnah ba dang hapoh 14 snem, bad ïa ka namlahduh la rah da ka Umphyrnai SC hadien ba ka la lah ban pynliem noh ïa ka PFR Football Accademy da 2-1 kol ha kane ka final kaba la sdang ha ka por 3:30 baje nohphaisngi.
Ka jingïakhun ka la long kaba shongshit ha kaba baroh arliang ki kynhun ki la ïoh mar kylliang ki kabu ban pynkhihjar hynrei ym shym la don ba lah ban thep haduh kaba kut jong ka kylla step.
Ha ka kylla kaba ar, ka Umphyrnai SC ka la ïoh ban lamkhmat lyngba ka kol ba la thep da u Vickyson Wankhar ha ka 40 minit.
Hynrei u Rafieldstar Nongkynrih jong ka PFR FA u la ïoh ban pynïakhaid shuwa ban kut ka por (58 minit) ban ïalam ïa kane ka jingïakhun sha ka extra time.
Dei hadien saw minit ba la ïaid ka por ha ka extra time ba u Damebantei kharkongor u la buh biang shakhmat ïa ka Umphyrnai ban lamkhmat ïa kane ka final da 2-1 kol.
Na ka liang jong ka PFR FA ka la pyrshang katba lah ban pynphai hynrei kam shym la lah satia wat hadien katto katne ki kabu kiba la wan bun sien lyngba ka free kick, bad haduh kaba kut ka extra time ka Umphyrnai ka la lah ban ïada khlem da shah thep bad ban rah syndon ïa ka namlahduh.
Ha kane ka sngi la ïoh ruh ban sam ïa ki certificate sha ki khynnah na baroh ar ki kynhun, bad ïa ka khusnam sha ka kynhun ba jop la ïoh ban aiti da u rangïalehkai phutbol ba kynsai jong ka jylla, u Eugeneson Lyngdoh u ba la don ryngkat ha kane ka sngi.
