Shillong, Nailar, 20: Ka Meghalaya State Kickboxing Association (MSKA) ka la pynkut noh ia ka jingjied bad ka jingai jinghikai ïa kaba la tip kum ka Meghalaya State Level Selection Trial cum Training Camp for Cadets and Junior cum Training Camp kaba la sdang naduh ka 14 tarik haduh ka 19 tarik, Nailar, 2023 shwa ba kin leit ïashim bynta ha ka rynsan ïakura jong ka WAKO India National Kickboxing Championship 2023 ka ban sa long ha sor Ranchi, Jharkhand naduh ka 23 tarik haduh ka 27 tarik, Nailar2023.
Ki don 20 ngut ki rang bad ki thei iakura ba kynthup ruh ïa ki khynnah rit kiba la shah jied ban leit iashim bynta ha kane ka lympung iakura ryngkat ka jingsynran lang jong ki Team Coach, Team Manager, u Referee nalor ki Official ka Meghalaya State Kickboxing Association.
Ha ka jingpynkut noh ïa kane ka jingai jinghikai ba la pynlong ha Aiom ksiar Martial Arts Academy kaba don ha ka shnong Nongrah Nonglum, Shillong la sakhi lang da u Secretary jong ka TMC Nongthymmai Constituency u Bah Teddy Kharshandi uba la long kum Kongsan, u Vice President u Bah Ksanbok Nongkynrih, u Working President jong ka Meghalaya State Kickboxing Association u Bah Larry Warjri, ki kmie ki kpa jong kine ki nongiakura, u Team Coach u Jezerel Sangma, ka Assistant Coach ka Indahun Iawphniaw bad u Team Referee Coach u samla Shaiborlang Lyngdoh bad kiwei kiwei.
U Bah Larry Warjri haba kren ha kane ka sngi, u la ïathuh ha kaba iadei bad ka kam Refree ha kane ka jylla ki dang duna bha bad ïa mynta ka la long ka jingkyrkhu ïa ka Jylla Meghalaya ba ka la lah ban sei 7ngut ki Refree bad kiba la poi haduh ka kyrdan International Level ha ka Kickboxing.
U la ïathuh ruh, naduh ba la sdang ia ka Kickboxing ha u snem 2017 haduh mynta bun tylli ki takam kiba ka MSKA ki la wanrah kum ka burom sha ka Jylla Meghalaya.
