Rah ka Pohkseh SC ïa ka namlahduh ha ka 2nd Division Football League 2023
Ha u Kyllalyngkot yn sdang ïa ka kyrdan 1st Division ka SSA.
Shillong, Nohprah 21: Ka kynhun ïalehkai jong ka Pohkseh SC ka la khylliap ïa ka aïom lehkai snem 2023 jong ka lympung 2nd DIVISION Football League ba la pynïaid da ka Shillong Sports Association kum ka lahduh hadien ka namjop ha ka jingïakhun final kaba la long hynne ka Sngi ha madan SSA Stadium.
Ka jingïaknieh namlahduh ha kane ka kyrdan ka la long hapdeng ka kynhun Mawtawar SC pyrshah ïa ka Pohkseh SC kaba la pynïakhun naduh ka por 1:45 baje mynsngi.
Ha kane ka sngi ïakhun final hapdeng kitei ki ar kynhun la wan sakhilang da ki dkhot nongkitkam jong ka Shillong Sports Association naduh u President.
Haba phai sha ka jingïalehkai ka long kaba itynnat bad kaba ïakhaid naba baroh ar kynhun ki la ïakhun tyngeh naduh kaba sdang ban ïoh pynkhihjar.
Kumba katto katne por ba la ïaid ka minit ha ka kylla step, ka Pohkseh SC ka la ïoh ban pynurlong ïa ka jingtreishitom jong ka ban thep kol ha ka 32 minit lyngba ka kol ba la thep da u Reinjoywell Wartde kaba la pynlong ïa ka kynhun ban ïoh lamkhmat ïa ka jingïalehkai ha ka kylla step.
Haba jam sha ka kylla kaba ar, na ka liang jong ka Mawtawar SC ka la ïakhun katba lah ban pynïakhaid hynrei ki bak jong ka Pohkseh kim shym la ailad satia ïa ka liang pyrshah ban pynurlong.
Haduh kaba kut jong ka por ka Mawtawar SC kam shym la lah ban pynphai ïa katei ka shi kol kaba la pynlong ïa ka Pohkseh SC ban khur ïa ka namlahduh jong ka 2nd Division mynta u snem 2023.
Na ka liang jong ka Shillong Sports Association ka la pynbna ba kan sa sdang ïa ka lympung lehkai 1st Division ha u snem thymmai, kata naduh 9 tarik u Kyllalyngkot 2024.
Shuh shuh, ïa kane ka lympung yn plie pyrda da ka jingïalehkai hapdeng ka Laitkor SC pyrshah ïa ka Malki SC ha madan SSA Stadium, Polo bad ka por kan long 2:15 baje nohphai sngi.
Kin don haduh hynñiew tylli ki kynhun ki ban ïakhun ha kane ka lympung 1st Division, bad kine ki kynthup ïa ka Laikor SC, Mylliem SC, Umphyrnai SC, Mawkhar SC, Lawsohtun SC, Nongrim Hills SC bad ka Malki SC.
Man kawei pa kawei ka kynhun ka ban ïakhun ha kane ka lympung ka donkam ban don tang 18 ngut ki player bad 5 ngut ki Official kiba kynthup ïa ki Physio lem bad u Coach.
Ka kynhun kaba ïeng shakhliehduh jong ka miej katkum ka jingbun poiñ kan ïohrah ïa ka namlahduh ka ban khur ruh ïa ka song tyngka kaba haduh 1 lak ryngkat ka trophy bad medal. Katba ka kynhun kaba wan ba ar ha ka jingbun poiñ kan ïohpdiang ïa ka song tyngka kaba long 50,000 ryngkat ka trophy.