Shillong Nailar 30 : Ka Khasi Student Union Umrynjah Unit ha ka sngi Saitjain ka la pynhap pyrda noh ïa ka lympung ïalehkai Inter Dong Football Tournament ba la pynïalehkai ha madan Umrynjah haka sngi Saitjain ka 27 tarik u Nailar, 2022.
Haba phai sha ka jingïakhun final ha katei ka sngi ka Mawsiatkhnam SC ka la ïohrah ïa ka namlahduh hadien ba ka la pynliem ïa ka Arka SC na ka shnong Umden da 4-2 ha ka jingïashut tie breaker hadien ba ki la ïakhaid da 1-1 ha ka jingïakhun ba 60 minit bad kumjuh ha ka extra time.
Ka jingïakhun ha katei ka sngi ka la long kaba itynnat bad shongshit bad ka Mawsiatkhnam ka la ïoh ban pynkhih jar nyngkong ha ka kyllastep lyngba u Teibor Mawlong katba ka Arka SC ka la ïoh ban pynïakhaid ha ka kyllamiet lyngba u Rivaldo Kurbah, uba la ïoh khur ruh ïa ka nam Best Player ha kane ka lympung ïakhun.
Katba ka nam Best goalkeeper ka la leit sha u Kipstar Pyrtuh ka Arka, ka Top Scorer sha u Noverson Marbaniang ka Mawsiatkhnam bad ïa ka nam best Discipline team la ïoh da ka Mawsiatkhnam.
U MLA ka Mawlai konstitwensi u bah Process T Sawkmie, uba la sakhi lang ïa ka jingïakhun final ha kane ka sngi kum u kongsan u la pynpaw ïa ka jingkmen ba ka KSU Umrynjah Unit ka la pynlong ïa kane ka lympung ïalehkai phutbol kaban ïarap bha ïa ki khun samla ban kyntiew ïa kane ka jingïalehkai ha ka thain.
Ha kane ka sngi u la kyrpad jur lang ïa baroh ban shim lang ïa ka jingkitkhlieh ban pynduh jait ïa u drok uba la jyllei ha ka thain bad haka ri hi ruh kumjuh.
U pynpaw ïa ka jingsngewbynniaw bad sngewsih kthang ba ha kine ki sngi kiba mynta ki khynnah kiba dang 12-14 snem ki la ïa ngop ha u drok.
Ha kane ka sngi u MLA u la sam ruh ïa ka trophy bad ka song pisa sha ka Mawsiakthnam kaba la long ka lahduh bad u symbud kongsan u samla Badonbok Malngiang, sport secretary ka KSU u la sam sha kaba wan baar ia ka trophy bad ka song pisa.
