Shillong, Nailar 30 : U rangñiah cycle ba pawnam, u Rojit Singh Yanglem ha ka sngi Nyngkong u la pynlut ïa ka por jong u ban ïa syllok bad ki samla ha Shillong halor ka jingdonkam ïa ka rukom bam bad ka rukom im kaba biang ha ka rynsan ba la pynlong da ka Ministry of Youth Affairs and Sports ba tip kum ka ‘Meet the Champion’ kum shi bynta ban rakhe ïa ka National Sports Day.
Ha katei ka jingïakynduh bad kumba 200 ngut ki samla pule ha St. Anthony’s Higher Secondary School, u Yangmlem u la pynpaw ïa ka jingkmen ban ïoh batai ïa kitei ki samla halor ka jingkordor ka rukom im kum u nongïalehkai bad ka rukom im kaba koit kaba khiah kaba dei ka bynta kaba kongsan tam ha ka jingim jong ki samla pule.
Nalorkata, u ong ruh ba ka long ruh kaba donkam shibun ban kilan met bad trei shitom ban paw ha ki jingïalehkai.
Ha kane ka rynsan, ki samla pule ka St. Anthony’s ki la buh ruh bun ki jingkylli ha kaba utei u samla ñiah cycle u la jubab lut la ka long naduh ki kam ïalehkai, kumno ban sumar met ne wat ha kaba ïadei bad ka rukom bam.
U Principal jong ka St. Anthony’s Higher Secondary School, u Rev Fr Anthony Kharkongor ruh u la pynpaw ïaka jingkmen halor ka sienjam ba la shim da ka sorkar Meghalaya bad ka sorkar India ha kaba la jied ïa ka skul jong ki na ka bynta ka prokram, ‘ Meet the Champion’.
U la ong ruh ba katei ka sienja ba shim da ka sorkar ban pynlong ïa kum kitei ki prokram kan wanrah ka jingkylla kaba bha na ka bynta ki samla pule bad kan ai mynsiem ruh ïa ki ba kin jied ha ka lynti ïaid jong ki nongïalehkai kiba khraw, ki nongïalehkai ba pawnam kiba ju wanrah ïa ka nam bad ka burom na ka bynta ka Ri.
Kum shi bynta jong katei ka prokram, u Yanglem u la ïalehkai basketball ruh bad ki samla pule ha katei ka sngi. Ha kawei pat ka liang u la ai ruh ka jingïaroh ïa u Myntri Rangbahduh ka Ri, u Narendra Modi na ka bynta ka sienjam ba u shim ban pynkhraw ïa katei ka sngi. U ong ruh ba u la pyrshang borbah bha ban kyntiew shuh shuh ïa ka rukom ïalehkai jon gu ha ki por ban wan bad ka thong jong u ka long wat ban ïoh mihkhmat ïa ka Ri ha ka 2024 Olympics.
Utei u rangñiah cycle u la donlang ruh ha ka kynhun kaba leit ban aireng ha ka Commonwealth Games kaba dang shu lah shen ha Birmingham kaba ki wan ha ka kyrdan kaba hynriew.
Katei ka sienjam ba shim da u Myntri Rangbahduh ka Ri ka long ban ailad ïa ki skul ban kynduh ïa ki khlur ïalehkai ka Ri ban ïa syllok bad ai mynsiem ïa ki samla pule ba dang khie bad ruh ban pynrung ha ki ïa ka mynsiem kumno ban sumar ïa ka met, naduh ka bam ka dih haduh ka rukom im kaba man la ka sngi.
Ïa katei ka jingïalap kylleng ka ri la sdang nyngkong eh da u Neeraj Chopra u rangïalehkai ba khur takma ksiar na ka Olympic, ha u Nohprah 2021 bad mynta ki la poi kylleng ki bynta jong ka Ri. Ha kane ka sien pyrshang bun ki nongïalehkai ba kynsai ki leit kylleng ki skul kiba don ha ki jylla bapher bapher ha ki 26 tylil ki jaka jong ka Ri ban rakhe ïa ka National Sports Day.