Shillong, Nohprah, 13: Ka Federation of Khasi Jaintia & Garo People (FKJGP), ka pynpaw ïa ka jingpyrshah kaba jur ïa ka jingthmu jong ka Sorkar Jylla ban pynkup bor ïa ka Investment Meghalaya Agency (IMA) ba kan thied ïa ki jaka puta ban ai pat sha ki nongseng karkhana hapoh ka Jylla.
Ka FKJGP ka pyrshah jur Amendment jong ka Meghalaya State Investment Promotion & Fecilitation Act, 2024 bad kam lah ban pdiang da lei lei ruh. Kane ka dei ka kyndon ka ban pyniap ïa ka jingmut ba shisha jong ka Meghalaya Land Transfer Act-ka Aiñ kaba ïada ïa ka hok longtrai ïa ka khyndew ka shyiap jong ki paid riewlum trai Jylla ka Meghalaya.
Ha u kyrwoh ba la phah da u General Secretary ka seng u Bah Eldie Newton Lyngdoh u la ong, ka jingailad ïa ka IMA ba kan thied jaka kan mut ruh ka jingduhnoh suki pa suki jong ki trai riewlum ka Jylla ïa ka hok longtrai halor ka khyndew ka shyiap.
Ka FKJGP ka buh jingkylli ïa ka Sorkar Jylla ba kumno ka wanrah ïa kane ka Amendment khlem ka jingïasyllok ïa ki Dorbar Shnong, ki Hima bad khamtam eh ki District Council haba 90-95% ki jaka ha Meghalaya ki dei kiba hap hapoh ka Sixth Schedule.
Ka Meghalaya State Investment Promotion & Facilitation Act (MSIPF), ka dei kaba la pynlong aiñ ban pynsuk ïa ka jingwan sengkam sengjam ha Meghalaya bad kan kyntiew ïa ka jingkiew shaphrang ka Jylla nalor ka lad aikam aijam ïa ki samla trai Jylla. Hynrei ban pynsuk ïa ka jingwan seng kam seng jam, kam mut pat ba ngi ki trai muluk ngin ïapeiñ ïa ki jaka puta bad ïa ka hok longtrai halor ka khyndew ka shyiap. Phi lah ban pynsuk ïa ka jingwan sengkam sengjam hynrei ka dei ban don da kiwei pat ki lynti ym ban die duh ïa ki jaka puta, la ong ka FKJGP.
Haba kren halor ka Meghalaya Industrial & Investment Promotion Policy (MIIPP), 2024, ka policy ka la kren halor ka jingthungkam haduh 90% ïa ki trai shnong ha ki kam Non-Manegerial bad 50% ki trai shnong ha ki kam Managerial. Ka policy ka dei kaba biang eh hynrei kumno ngin shaniah ba ka policy kan treikam kumba la buh ïa ka”.
Ngi sngewthuh ba kane ka policy ka dei kaba thymmai kaba tyrwa aikam ïa ki samla ha ki karkhana ba dang seng thymmai. Hynrei, ngi la sakhi da ki phew snem ïa ka Industrial Policy ka Sorkar kaba tyrwa aikam ïa ki samla trai Jylla ha ki karkhana ba seng ha Jylla. Ki karkhana kila mih da ki spah tylli hynrei mano ba ïohnong pat. Katno percent ki samla jong ngi, ki ïohkam ha kine ki karkhana kam pher la ki dei ki Unskilled, Semi Skilled ne Highly Skilled. Kaei kaba jia ha ki snem bala leit noh, ka pynartatien ïa ngi ban shaniah ha kane ka Policy ba thymmai, la bynrap u kyrwoh.
Halor kine kiei kiei, ka FKJGP ka dawa ia ka Sorkar Jylla ba kan pynsangeh syndon ïa kane ka Amendment bad ban pyrkhat noh da kiwei ki lad ki lynti ki ban nym ktah ïa ka hok longtrai ïa ka khyndew ka shyiap da ki paid riewlum ka Jylla.
