Ka long kaei kaei kaba sngewkhia bad i lyngngoh ban ïohi ïa ka jinglyngkar ka imlang sahlang ha ki thaiñ jong ka Khyndailad sha lyndet ka Assembly barim hajan jong ka Pegasus Crown Hotel ha lyndet jong ka ïingmane English Servcice, “hato la pynlong aiñ mo ïa ki kam nuti ha Shillong, hapoh ka jylla Meghalaya”?. Kitei ki bynta ki dei kiba ju ïaid parade bha ki kynthei kiba leh model man ka miet harud surok bad i kum katei ka jaka imat kam dei kaba hap shuh hapoh kino ki shnong ne ki rangbah shnong kumta ki la i long lyngkar bha bad i kumba kim dei shuh ki jaka na hap hapoh ka ri Khasi kata kaba ngi ju ong ka ri tip briew tip Blei. Ha kine ki sngi la ïohi ïa kata ka jingïa pyrshah ia kata ka ktem khalai, katba hangne ha pylliew khmat pat ym don ba ïohi shuh imat ki la ïa ïohi jngai eh baroh baroh !
Kitei ki jaka ki la i kumba ki dei kita ki Red Light Zone ne ki jingkhang iit jong ki kam lyngkar, kiba ju don sha kiwei ki sor bah ka ri India ne ri phareng bad man la ka miet ki kali kiba har rukom ki ïeng ban ap ïaluh bad kitei ki ‘thei leh model, kiba bun na ki hi imat ki dei kiba na ka jait bynriew khasi la jong bad kumba la kynthoh da utei u rangbah ka long shisha kaba i pangnud ban ïohi ba haduh katno kane ka jaitbynriew rit paid jong ngi ka la hiar shisha. Lah ban pynkynmaw bad u Bah Adelbert Nongrum, MLA ka North Shillong , u la dep ban kren hapoh ka iing Dorbar Thawaiñ ka Jylla, u la ban jur ïa ka sorkar ban peit ïa kane ka jinglong jingman jong ka nongbah Shillong. Hynrei haduh mynta katei ka thaiñ jong ka Khyndailad ka dang ïai long hi ka jingkhangiit jong ka rain ka rem jong ka nongbah bad khamtam lei ka jaidbynriew khasi rit paid jong ngi.
Kito ki ‘thei lyngkar kiba ju don ha kitei ki thaiñ man ka miet ba la kem dum, kin dei beit kiba sah ha ki shnong Khasi bad ki dong bapher bapher jong ka Nongbah Shillong. Lyngba jong katei ka jingkhangïit lah ban ithuh bad ban sngewthuh ba haduh katno ka jinghiar dor jong ka imlang sahlang, ka jingjot jingpei jong ki longïing longsem, ka jingpait jingpra jong ka shongkha shongman kat haduh ban pynlong ïa kiba bun ki kynthei ba dang khie dang san ban long kiba kutlad noh bad duh noh ïa ka bor pyrkhat jong ka jingtrei shitom ha ka jingim hynrei ki jied pynban da katei ka kam nuti bad ka jingim kaba lyngkar ban bsa khun bsa kti. Ym tang katta hynrei la sngewthuh ruh ba napdeng jong kitei ki riew lyngkar ki don ruh kiba shu kwah ban kamai suk bad leh ia ki kam awria ban pyndep ïa ka jingbrai kaba la longdoh longsnam ha ka jingim jong ki.
Hooid ki briew baroh ki don la ka jong ka jong ka hok ban im ne ban kamai, hynrei ka jinglaitlan jong kine ki jaidbriew ka bun jingeh bad jingma ïa kiba bun kiwei pat ki longiing kiba lui lui. Kum ka nuksa ki don ki shynrang kiba ha ba iathut bad la ka jong ka kurim, ki leit ban ngop bad kitei ki briew kiba lah ban don ïa ki jingpang AIDS/HIV bad hadien da la ïasuk bad la ka kurim pat ki leit phai biang bad la don bun kiba kum kita kiba la pynsaphriang ïa ka jingpang AIDS ruh. La ïoh jingtip ruh ba wat ki hijra ne kita ki Transgender ruh ki ïadonbynta bha ha kitei ki kam lyngkar kane ka nangpynshlsur shuh shuh ïa ki briew kiba juh jingkyrmen ban shim daka lynti ka bymlong namar ba ka jingkhang jong ka ka long kaba kylluid bad kaba lyngkar.
La kumba shi snem ei ei kawei ka sengbhalang bad kiwei ki riew trei mon sngewbha ki la khynra ia kawei ka jaka ba ju leh kam lyngkar ki nuti hapoh Ri Bhoi District. Hynrei ka long kaba lyngngoh ban ïohi bad ki thaiñ jong ka khyndailad ba la kdew haneng pat imat kim dei shuh hapoh ka jylla Meghalaya ne ha ka ri Khasi?. Katei ka thaiñ hakine ki sngi la i kum ka Mini Bangkok ne ka ktem nongwei aiu re bad ka jingthnem ka iew khaii met te la ishyrkhei shisha. Shano ki sengbhalang ? Shano ki Seng Longkmie/ Seng Kynthei ? SHANO KA LAWEI JONG KA SOR SHILLONG !
