Pyrshah ki saw seng ïa ka Public Hearing ka M/s Meghatop Cement Pvt. Ltd. ban shna karkhana ha ka shnong Wahïajer

Khliehriat, Risaw, 04: Ki saw tylli ki sengbhalang ba kynthup ïa ka Hynñiewtrep National Youth Front (HNYF), Ri Jaiñtia Youth Federation (RJYF) bad ka Hynñiewtrep Achik National Movement (HANM) ha ka sngi Thohdieng lyngba u Deputy Commissioner jong ka East Jaiñtia Hills District u Shivansh Awasthi, ki la phah da ka jingthoh sha u Member Secretary jong ka Meghalaya State Pollution Control Board (MSPCB) ban pynpaw ïa ka jingpyrshah kaba jur halor ka jingthmu jong ka Meghatop Cement Pvt. Ltd ban pynlong ïa ka jingpynsngew paidbah ne ka public hearing ha ka 18 tarik mynta u bnai na ka bynta ban shna ïa ka karkhana dewbilat ha shnong Wahiajer, East Jaiñtia Hills District.
Kitei ki saw seng lyngba ka jingthoh ba la soi da u dkhot jong ka HNYF Central Body, u bah Shaniahlang Suchen, u President ka Ri Jaiñtia Youth Federation, u bah R. Rymbai, u nongïalam jong ka Hynñiewtrep Achik National Movement, u bah Wankishwa Mawlong bad u nongïalam jong ka Hynñiewtrep National Youth Movement, u bah Lio Suiam ki la pynpaw ba ka jingpyrshah jong ki ka dei halor ki nongrim kiba shongnia, haba kren halor ka phang kaba ïadei bad ka jingshah ktah ka mariang la ong ba “Ki la don lypa mynta haduh shiphew tylli ki company dewbilat kiba la treikam hapoh ka elaka Narpuh ha East Jaiñtia Hills District bad kine ki karkhana ki la pynmih ki lyer jakhlia bad ktah ruh ïa ki um ki wah ha ka thaiñ kum ka jingshah ktah ka wah Lunar bad ka wah Lukha, kane ka thaiñ Narpuh ka dei ruh ka jaka ba don ka khlaw Ecological Sensative Zone ba kynthup ruh ka Narpuh Reserved Forest kaba don hajan ka Wildlife Sanctuary, ka jingshah ktah ka la don bad la sakhi, kumta lada dang don shuh shuh ki karkhana ha ka thaiñ kan sa nang kham sniew shuh shuh ka jinglong jingman ka mariang, ka jingsawa kaba mih bad ka lyer jakhlia kaba mih na ki karkhana kiba la don lypa ka ktah ïa ka koit ka khiah jong ki nongshongshnong, ka jingshah ktah ki um ki wah, ka la ktah ïa ki briew bad ïa ki mrad, ngi ngeit ba ka sorkar kam shym la shim khia satia ban ïada ïa ka thaiñ bad ka jingwanrah shuh shuh ïa ki karkhana kan sa nang ktah shuh shuh ïa ka jinglong jingman ka mariang ha ka thaiñ ”
Kitei ki sengbhalang ki la pynpaw ruh ba ka jingdon bun tylli ki karkhana dewbilat hapoh East Jaiñtia Hills District kam pat shym la lah ban tehlakam ïa ka jingkyrduh kam ki paidbah ka thaiñ bad kumjuh ruh ha ki kam pynroi ki paidbah bunsien ki kynduh jingeh katba ki karkhana pat ki dang pyntrei kam shaid shaid.
“Ngi sngewkhia ruh namar ka jingkiew dor ka dewbilat hapoh ka district kaba dei ka district kaba don ki karkhana ba pynmih dewbilat, ka dor jong shi byrni ka dewbilat ka long T450 tyngka ha ki ïew kiba don ha ka thaiñ bad kane ka dei ka dor kaba heh nalor ba ïa u dewbilat la pynmih napoh ka district hi, ka jinglong jingman ka ktah ym tang ïa ka khaïi ka pateng hynrei ka jingdon ki karkhana dewbilat pat ki la bun hapoh ka district, ngi kyntu ïa ka sorkar ba ka dei ban shim khia ban leh eiei da kaba tyngeh lada ki karkhana kim lah ban ai kam ai jam haduh 100 percent ïa ki briew ka thaiñ bad ruh lada kim lah ban ai ne die ïa ka dewbilat ha ka dor kaba biang”
Na ka liang kitei ki sengbhalang ki kyntu jur ïa u Member Secretary jong ka tnat Meghalaya State Pollution Control Board ban leh mardor ïa ka kam ban khanglad ïa katei ka karkhana dewbilat ba tnymmai, Megatop Cement Ltd kaba la thmu ban tei ha shnong Wahiajer East Jaiñtia Hills District, ki seng ki kyntu ruh ba ka tnat ka dei ban pyrkhat lem na ka bynta ka jingbit jingbiang ki paidbah ka thaiñ, na ka bynta ka jingbit jingbiang ka mariang bad ka khlaw Wildlife Sanctuary kaba don ha ka thaiñ Narpuh.