Nongpoh, Nailar 20: Ki nongshong shnong jong ka shnong Umroi Madan, Ri-Bhoi District ha ka sngi Baar ki la leit ban ujor sha u Deputy Commisioner jong ka Ri-Bhoi District halor ka jingthmu jong ka Sorkar ban pynkynriah ïa ka jingïaid lynti jong ka Surok Four Lane ba la thmu ban shna thymmai na Umiam sha Malidor.
Ka jingpyrshah jong ki paidbah ka la mih hadien ba ka Sorkar ka la thmu ban pynkynriah ïa ka jingshna ïa ka surok Four Lane na ki ranab lum jong ka shnong Umroi Madan kaba don ruh ka tyllong umbam umdih kaba ki paidbah ki ju pyndonkam baroh shi katta.
Ha ka jingïakren bad ki lad pathai khubor, u Bah CL Masharing bad u Bah T Marbaniang ki pynpaw ka jingsngewkmen halor ka jingthmu ka Sorkar ban shna ïa ka surok Four Lane na Umïam sha Malidor hynrei kum ki nongshong shnong ki pynpaw ruh ïa ka jingsngewsih namarba katkum ka jingtip jong ki hadien ba ladep ban leh ïa ka jingsorjamin ïa ki jaka, ka Sorkkar kan pynkynriah ïa ka jingïaid lynti jong ka Surok sha ki ranab lum kiba hap hapoh u pud u sam jong ka shnong Umroi Madan.
Ki la ong ruh ba ranab lum ka dei ruh ka jaka ba don ka tyllong umdih jong ka shnong kaba long ruh kum ka jingim jong ki paidbah nongshong shnong namar ka dei ka um kaba ki pyndonkam ban bam ban dih bad ban sum ban sait.
Kum ki paidbah nongshong shnong ki la kyrpad ïa ka Sorkar ba ka dei ban pynïaid ïa ka surok na kajuh ka surok Shillong Bye Pass khnang ba kan ym ktah ïa ki tyllong um jong ka shnong Umroi Madan.
