Shillong, Risaw 17 : Ka Saindur Tipkur Tipkha Ehrngiew Hynniewtrep (STIEH) ha ka sngi Ba-ar ka la pynpaw ka jingpyrshah kaba jur halor ka rai jong ka sorkar ban pynkut ïa ka tamasa Shillong Cherry Blossom ha ka sngi U Blei.
Katei ka tamasa ka la dei ban sdang ndauh ka 01tarik u Naiwieng bad kut pat ha ka 19tarik kaba dei ka sngi U Blei.
“Ngi pyrshah jur ïa kane ka rai ban pynkut ïa katei ka tamasa ha ka sngi U Blei namar kadei ryngkhat bad ka sngi khuid katkum ka jingngeit jong ki Khristan,” ong ka STIEH ha ka dorkhas kaba ki phah sha u Myntri ka tnad Tourism, Bah Paul Lyngdoh hynne ka sngi.
Katei ka seng ka ong ruh ba ka sngi U Blei la niew ba kadei ka sngi khuid ha ka jylla Meghalaya katkkum ka jingngeit jong ki Khristan ka jingngeit kaba bun ki nongshong shnong ka jylla ki bud ïa ka. “Ïa ka Meghalaya la tip kum ka jylla kaba tipbriew tip Blei. Kumta ka sngi U Blei kadei ka sngi kaba la buh kyrpang na ka bynta ban pynlut por ha ki kam mane Blei bad ka jingpynkut ïa katei ka tamasa ha ka sngi u Blei kaba pyni ban burom noh ïa u dieng kadei ka jingñiewbeiñ ïa ka jingngeit jongngi bad ruh ïa u Blei,” bynrap shuh shuh ka STIEH ha ka kyrwoh.
