Nongstoiñ, Ïaïong, 18: Ka seng West Khasi Students Union ka pynrem jur ïa ka jingpynieng beaiñ sa kawei pat ka kompani kaba suba kum ka M.D Coke Ferro Alloys Factory kaba thymmai ha ka shnong Rwiang. Katei ka karkhana thymmai ka don mar shilliang jong ka wah Rwiang kaba mar pyrshah bad ka Ferro Alloys Pvt.
Ka jingshna ïa katei ka karkhana ka ïai bteng haduh mynta mynne, hynrei kaba lyngngoh ka long ba ym shym la pynlong wat tang ïa ka puplic hearing ruh bad kane ka dei ka kam beaiñ suda jong ki bar jylla.
Ka jingpynibor ban pynieng karkhana harud ka wah Rwiang khlem ki kyndon kiba biang, kan sa ktah ïa ka jinglong jingman ka mei mariang ha katei ka thaiñ, khamtam ïa ki nongshong shnong jong katei ka shnong Rwiang.
Ka jingmih biang sa katei kawei ka karkhana saiñ nar kan wanrah biang ruh sa kiwei pat ki huri hura, namar ba la tip tikna ba katei ka company thymmai kan ym bud ïa ki kyndon kumba la pynkheiñ kyndon da ka Shree Shakambari Ferro Alloys Pvt Ltd haduh ki paidbah na katei ki dang pyrshah ban plie haduh mynta.
Ka seng kan sah tih bniah ïa katei ka company thymmai, namar ha kano ka rukom la pynieng hangtei khlem ki jingteh kyndon kiba skhem la ka long na ka lïang ka sorkar bad ki bor shnong lane ki bor hima sima, ong u samla D.Sun President WKSU.
