Shillong, Risaw 15: Ka Meghalaya Tourism Development Forum (MTDF) ka la pynpaw ïa ka jingpyrshah kaba jur ha kaba ïadei bad ka jingkhang ïa ki kali tourist kiba wan na Assam kiba kit ïa kiba wan jngohkai sha kane ka jylla Meghalaya. Ka MTDF ka pyrshah jur ïa kano kano ka jingthmu ban pynsangeh ïa ki kali tourist kiba wan na Assam naba kane kan ktah ïa ka roi ka san ki kam jngohkai ha kane ka jylla Meghalaya, ong u President ka MTDF u Bah Larsing Sawyan ha ka shithi ba la phah sha ka sorkar lyngba ka committee halor ki kam jngohkai ba la thaw da ka sorkar.
“Ka jingkiew ka jingwan ki nongjngohkai sha kane ka jylla, katta nangkiew ka lad halor ka ïew ka hat na ka bynta ki tourist taxi hadien habud, ong u Bah Sawyan. U la ong ba ka jingïakhih kaba dangshen da katto katne ki Meghalaya tourist taxi ka la ktah ïa ka jingwan ki nongjngohkai pyrthei kaba la long naduh u bnai Naitung haduh u bnai Nailur 2024, ha kaba kane ka la lam sha ka jingduh nong kaba da ki hajar tyngka ïa ki hotel, ki nongpynïaid ki guest house, ki guide, bad ki restaurant, ki dukan die sha, ki nongrep bad ki nongdie jhur ha madan.
Haba ong ba ka MTDF ka ïeng ban ïatreilang bad baroh ki nongshong shnong ban wad ïa ki rai bad ban pynthikna ki lad jingïada ïa baroh ki nongjngohkai kiba wan sha kane ka jylla Meghalaya, u Bah Sawyan u la ong, “Ka Meghalaya kam pat kynjoh sha ka bynta ban kyntiew bha ïa ki kam jngohkai bad ki lad ki lynti ban ïoh na ka, namar kata ki la don bun ki jingpyrshang ba kam dei ban don ka jingshah pynthut ki ban ktah ïa ka jingkiew ki kam jngohkai ha kane ka jylla.”
U Bah Sawyan u la ong ba ki tourist taxi operator ki dei ban ïasyllok lang bad kiwei ki nongshong shnong kiba pynïaid ïa ki kam jngohkai ha ka jylla ha shwa ban shim ïa kano kano ka rai kaba lah ban ktah ïa ki kam jngohkai.
Na ka liang ka MTDF ka la ong ba ka donkam ban pynbeit ïa kane ka kam kaba kynthup ban don noh tang kawei ka association jong ki tourist taxi, ha ka jaka ban don bun ki seng kiba treikam mynta. Ka la ong ruh ba dei ban don ka jaka pynïeng kali kaba biang na ka bynta ki tourist taxi, ban don ruh ki jingai jinghikai kiba kongsan, nangta ka jingkhuid jingsuba, ki jinghikai halor ki sap ki phong, ki riam ki beit ne dress code, bad kiwei kiwei, ong ka MTDF.
