Pyrshah ka KSU Narpuh ïa ka ‘Public Hearing’ ka MSPCB halor ka jingthmu pynïar treikam ka karkhana dewbilat

Khliehriat, Nailar 17: Ka Khasi Students’ Union (KSU) Narpuh circle ka pynpaw ka jingpyrshah kaba jur halor ka jingthmu ka MSPCB ban khot ïa ka jingpynsngew paidbah ne ka public hearing na ka bynta ka jingthmu jong ka Meghalaya Cement Ltd, Thangskai ban pynheh ïa ka jingpynmih clinker kaba na ka 2600 TPD sha ka 4500 TPD lem bad ka 10 MW CPP bad 9.5 MW WHRS da kaba kane ka kompeni kan tei ïa ka plant thymmai (Existing Plant) jong ka.
ïa kane ka jingpynsngew paidbah la buh sngi ban pynlong ha ka 24/08/2023 ha MCL, Thangskai.
Halor kane ka bynta na ka liang ka seng mynta ka sngi ka la leit ban ai da ka jingthoh ha u Member Secretary MSPCB, Shillong, ha kaba katkum ka jingthoh ba la soi sa u President KSU Narpuh Circle, u bah K.S.Suchiang, ka seng ka la pynpaw ïa ka jingpyrshah bad ong ruh ba lada ailad ïa kane ka jingthmu kan wanrah ka jingduh nong kaba khraw ïa ka mei mariang bad kan ktah jur ïa ka jinglkng jingman ka mariang sawdong.
La ong ba ka seng ka sngewthuh ba kane kan ktah jur ïa ka lyer khuid (Oxygen) bad kan ktah ruh ïa ka ring mynsiem jong ki briew, namar wat tang mynta ym lah ban tip haduh katno ka jingdon ne ka jinglong jingman ka lyer khuid (Air Quality) ha kito ki thaiñ ba don ki kharkhana dewbilat.
Ka Seng ka la ong ba ka sngewthuh ruh ba baroh ki jakhlia kiba mih na katei ka jingpynmih (production) jong katei ka plant thymmai kan nang pynjaboh shuh shuh na kaei kaba long mynta ha kaba ki tyllong um kim long shuh ban pyndonkam.
Nalor kata ka la ong ruh ba suki suki ki nongshong shnong jong kine ki thaiñ kin duh noh wat ïa ki tyllong um bam umdih bad aïu kan jia ïa ka pateng ban wan, namar kine ki kompeni kim don satia ïa ka STP. Ka seng sngewthuh ruh ba lyngba kane ka jingpynheh ne tei plant thymmai kan wanrah bad ktah ïa ka bor iohsngew ne kata ka sound effectslyngba ka jingmih ka jingsawa ba jur lyngba katei ka project WHRS, kata ka ban ktah khamtam eh ia ki khunlung khynnah kiba dang lung ka rta bad ruh ha kaba ïadei bad ka thiah ka dem ka jong ki.
Kumta ruh halor kine ki katto katne ki jingpynpaw kiba khyndiat ïa kiba na ka liang ka seng ka la kdew ba kan don beit ka jingktah lada ailad ïa katei ka jingthmu. Nalor kata ka seng ka pynpaw ruh ka jingngew lyngngoh ba kumno ka MSPCB ka ailad ban pynlong ïa katei ka jingpynsngew paidbah khlem da bishar bha ka don ne em ka jingktah ïa ki paidbah nongshong shnong.
Shuh shuh ka seng kala ong ruh ba kumno ba la shu ai lad shi ai lad ïa kine ki kompeni ba kin ïoh ban pynïar ïa ka khaïi jong ki da kaba ki pynjot ia ka mei mariang. Kumta ka seng ka dawa ïa ka MSPCB ban pynsangeh shwa ïa katei ka jingthmu pynlong ïa ka public hearing bad ban bishar shwa ha baroh ki liang.