Pyrshah ka KSU ba pynkupbor da ka aiñ ïa ka IMA ban thied jaka ban ai sha ki Investor

Shillong, Nohprah, 12: Ka Khasi Student Union (KSU) ha ka sngi Palei ka la dawa ïa ka Sorkar Meghalaya Democratic Alliance (MDA) ban pyndam mardor ïa ka jingpynbeit thymmai ïa ka aiñ Meghalaya State Investment Promotion & Facilitation Act 2024 kaba la aibor ïa ka Investment Meghalaya Agency (IMA) ba ka lah ban thied jaka ha kane ka jylla bad ban aiti sha ki Investor kiba wan nabar ka jylla lane nabar ka ri kaba long pyrshah ïa ka Meghalaya Land Transfer Act.

Ha ka jingïakren bad ki lad pathai khubor u General Secretary jong ka KSU u samla Donald V. Thabah u la ong, “ngi pyrshah bad ngin sa pan ka jingpynshai na ka Sorkar bad lada ka long shisha kumba ngi ïohi ka Sorkar ka dei ban pynkut bad ban pyndam noh mardor ïa kane ka aiñ hynrei ka seng kam banse ban shim da kiwei pat ki sienjam.”

U la ong ba ka seng ka dawa ruh ïa ka jingpynshai na ka Sorkar bad ong ruh shen kan seng kan sa phah da ka jingthoh sha ka Sorkar.

“Ngi ïohi ba kane ka aiñ ka lah ban ïaid lait lut na baroh ki aiñ jong ki tnat treikam bapher bapher bad ba ka  Investment Meghalaya Agency ka lah ban shim da ka bor bad wat kano kano ka bor jong ka aiñ ruh kam lah ban pynshitom lada ki leh ïa kano kano kaba bakla,” u la ong. “Ngi pynpaw ka jingsngewkhia bad ka jingsngew kyndit ban ïohi ha ki katto katne ki thup khubor ba ka Sorkar Jylla la ka wanrah ïa ka jingpynbeit thymmai ïa ka Meghalaya State Investment Promotion & Facilitation Act 2024 ba la ai bor ïa ka  Investment Meghalaya Agency ba ka lah ban thied jaka bad ban aiti sha ki Investor,” ong u samla Thabah.

Haba kylli, u la ong, “kham mynshwa ngi la ïoh ïa ka tyllong jingtip ba thikna kaba ong ba ki Revenue Land ne jaka Sorkar ka don ka jingthmu ban aiti sha ki katto katne ki heh saipan. Ka seng ka dang tih bniah ïa kane bad lada ka don ka jingbuhrieh na ka Sorkar ha kawei ka sngi kan sa paw pylleiñ bad ka KSU hi kan ym ailad daleilei ruh em ba ïa ka jaka jong ka Sorkar kaba dei jong ki paidbah yn shu lilam sha ki heh saipan.”

“Ka jingkren jong ka Sorkar kam da shai ha kano ka rukom yn ai ïa ka jaka sha ki Investor bad kaei kaba ngi sngewthuh halor ka jingpynkupbor bad ka jingaipor jong ka jingpynbeit thymmai (Amendment) ïa ka  Investment Meghalaya Agency ka long pynban kumba ïaid lait na ki Dorbar Shnong, ki Dorbar Hima, Dorbar Raid bad na ki Autonomous District Council (ADC),” ong u General Secretary ka KSU.

“Ka jylla Meghalaya ka dei kaba hap hapoh ka Khyrnit Bahynriew bad ka don ruh ïa ka Meghalaya Transfer of Land (Regulagtion) Act, 1971 kaba ïada ïa ki jaka ki puta jong ngi ki riewlum ritpaid khnang ban lait na ka jingshah klun ha kiwei pat ki jaidbynriew kiba kham ïaid shakhmat bad kiba kham bit kham biang,” ong ong shuh shuh u samla Thabah.

“Ka jingwanrah ïa ka jingpynbeit thymmai ïa ka Meghalaya State Investment Promotion & Facilitation Act 2024 ngi ïohi  ba ki la ïaid lait lut na ka Meghalaya Transfer of Land (Regulagtion) Act, 1971  kaba long pynban kumba pyntlot bor ïa kane ka aiñ bad kane kan buh jingma wat ïa ka jaidbynriew Khasi,” ong kynthoh u samla Thabah.

“Lada ka  Investment Meghalaya Agency ka lah ban thied jaka da ki hektar bad kan ai pat sha ki Investor. Mano kita ki Investor, hato ki dei ki trai jylla ne ki lah ban dei ki trai jylla,” la buh jingkylli une u nongïalam ka KSU.

“Lada wan kita (ki Investor) shibun ki jaka jong ngi ki riewlum ritpaid kin shah klun bad kin long trai da kiwei pat ki jaidbynriew bad kin long trai da kiwei pat ki kompeni kiba heh,” u la bynrap.

“Ngi ïohi ruh ba ka lah don ka Governing Council ne ka Nodal Agency kaba la shah pynkupbor haduh katta katta ba ngi lah ban ong ba ym lah wat tang ban ujor ejahar ym lah ban pynshitom ïa ki watla ka don kano kano ka jingbamsap ne kano kano ka jingleh bakla ïa ka kamai kajih,” u la ong bad bynrap, “ngi ïohi hi haba ki wan ki kompeni kiba nabar kham ñiar eh ba ki paradoh parasnam jong ngi kin ïoh kam.”

U la ong haba peit sha kiwei ki jylla kum ha Haryana dang shen ka la mynjur ïa ka aiñ kaba bthah 75 percent ki Private Company ki dei ban aikam sha ki trai jylla, kumjuh ruh ka Madhya Pradesh, ka Andhra Pradesh, Karnataka, Maharashtra ki don ïa ka aiñ kaba buh 70 percent ki Private Company ki dei ban aikam ïa ki trai jylla.

“Hynrei haba ngi peit pat ha kane ka jylla jong ngi, kum kata ka aiñ kam don. Ka pawshai ba lada ki wan ki nongsengkam kiba nabar ka jylla bad nabar ri kan long ka jingmyntoi jongno jongno ne ka jingmyntoi shimet ne ka lah ban dei tang ka jingmyntoi ïa ka kompeni ne kino kino kiba donkti ban wanrah ïa ki nongsengkam,” la kynthoh u General Secretary ka KSU.

“Kan long ka jingma kaba khraw ïa ka jylla jong ngi, namarba ki jaka ki puta  kin shah klun haba ki wan kine ki Investor,” u la ong.