Pyrshah jur ka Ri Bhoi Dobar ban wan rah Casino ha Ri Bhoi

Nongpoh, Nailar 23: Ka Ri Bhoi Dorbar kum kawei ka kynhun ki nongïalam ba rangbah na Ri Bhoi District mynta ka sngi ka la mih shakhmat ban ieng halor ka nongrim na ka bynta ban pyrshah jur ïa kata ka jingthmu ka sorkar jylla ban wan rah da ka Casino ha Ri Bho.
Kane ka jingpyrshah ka Ri Bhoi Dorbar halor ka jingtmu ban wan rah ïa ka Casino ka la paw pyrthei ruh mynta ka sngi, kaba dei hadien ba ki Nongïalam ka Ri Bhoi Dorbar ba kynthup ïa u Nongaibuit ba rangbah, u Bah R.R Makdoh bad u President ka Ri Bhoi Dorbar, u Bah R.B Shadap ki la kren sha ki lad pathai khubor, ba ka Ri Bhoi Dorbar kan pyrshah jur ïa kane ka jingthmu ban wan rah ïa ka Casino ha Ri Bhoi District.
Naduh u Bah R.R Makdoh bad u Bah R.B Shadap haba kren sha ki lad pathai khubor, ki la ong ba ka Ri Bhoi Dorbar ruh ka pyrshah jur ïa kane ka jingthmu ban wan rah ïa ka Casino ha Ri Bhoi bad kum kawei na ka kynhun ki nongïalam ba rangbah na Ri Bhoi ka ai ruh ka jingkyrshan ïa ki Seng Bhalang kiba la mih ban pyrshah ïa kane ka Casino ban don hapoh u pud u sam ka Ri Bhoi District.
“Ka Ri Bhoi Dorbar kam kwah satia ba ka Ri Bhoi kan long kawei na ka ktem khalai hapoh ka jylla ba da ka jingdon kane ka ktem khalai kin mih bun jaid ki jaid jingsniew” ong u Bah R.R Makdoh, uba dei u nongaibuit ka Ri Bhoi Dorbar, bad bynrap ruh da kaba ong ba ka Ri Bhoi Dorbar ka sngewthuh shai ba ka jingthmu ka sorkar ka long ban pynmih ïa ka khajna na ka bynta ka jylla ba ka jingioh lum ïa ka khajna na ka kane ka ktem khalai kan kham khraw ka jingjot kaba ktah ïa ki paidbah ban ïa kaba ka sorkar kan ioh lu ïa ka khajna” u la bynrap.
Na ka liang ka Ri Bhoi Dorbar ka la rai skhem ban kan pyrshah ïa kane ka Casino bad ka buhr uh ka jingkyrpad sha ka sorkar jylla ba kam dei ban ai bor na ka bynta ban wan rah ïa kane ka ktem khalai bad lada ka sorkar ka sngap ïa ka jingpyrsha jong ki paidbah kum ka kynhun kam banse ban shim da kiwei ki lad ki lynti ban ïa pyrshah ïa kane ka ‘Casino’ Lane kane ka ktem Khalai kaba long ka jingpynjot ïa kiba bun ki longing khamtam ki khun samla ka District bad ka jylal hi baroh kawei.
Na ka liang u Bah R.B Shadap u la pynpaw ruh ba ka sorkar ka hap ban pyrkhat arsien na ki jingjot bad ki jingsniew ki ban sa mih na kane ka Casino bad kum ka Ri Bhoi Dorbar ka pynpaw ruh ba lada ka sorkar ka pyntreikam hok tang ïa ka khajna ba ka ioh lum na u Dewiong bad kiwei kiwei ki mar poh khyndew kiba don ha ka jylla ka la biang pura ba kan pyntreikam na ka bynta ki kam bad ki kam pynroi ba dei ban ioh jingmyntoi ki paidbah, bynrap u bah R.B Shadap, President ka Ri Bhoi Dorbar.