Shillong, Ïaïong 28: Ka Meghalaya Pradesh Mahila Congress ka pynpaw ïa ka jingsngewsih bad ka jingpyrshah jur halor ka jingpynbna khang dukan da ki barabazar merchants and traders ha ka 28/04/2025. Kane ka rai ban khang dukan, katkum ka Mahila Congress, ka ktah jur ïa ki paidbah kiba la mad shibun ka jingshem jingeh ha ka imlang sahlang bad ha ka jingïoh jingïarap.
Ha ka kyrwoh, ka President jong ka Mahila Congress kong Joplyn Shylla ka ong ba ha kum kane ka por ba ki paidbah ki dang shem jingeh na ki jingeh ka ïoh ka kot, bad ka jingkiew dor ki marbam mardih, ka jingïaid beit ki kam dukan bad ki service ka long kaba donkam tam. Ka pyrshah ïa ka rukom pynlong khang dukan khlem da ïaid lyngba ka lynti ba biang lane ka jingïasoi jingmut bad ki paidbah.
Ka Meghalaya Pradesh Mahila Congress ka kyntu ïa ki nongpynïaid bad ki bor synshar ba kin shim khia bad pynbeit noh mardor ïa kane ka jingeh da kaba buh ha khmat ka bha ka miat jong ki paidbah, ong ka kyrwoh ba la phah da ka Kong Joplyn Shylla President MPMC.
