Shillong, Ïaiong 28 : Ka BJP Meghalaya ha ka sngi Nyngkong ka la kynthoh ïa ka Congress namar ka jingpyrshah ïa ka sienjam ba shim da ki nongkhaïi ka Shillong ban khang ïaki dukan jong ki kum ka dak ka jingsnohkti lang ban sngewlem ïa ki lanot ha ka jingjia shah hiar thma ha Pahalgam dang shen.
Ha ka kyrwoh, ka President jong ka Meghalaya BJP Mahila Morcha, Kong Susuki Pariat ka la ong ba ha ka por ba ka ri ka dang don ha ka jingpang mynsiem na ka jingshah hiar thma ki mynsiem ba lui lui ha Pahalgam bad ba ka pyrthei baroh kawei ka kyndit lut da ka jingleh jong ki lehnoh ha Kashmir, hynrei kim poi pyrkhat ban ïohi ïa ka sienjam ba shim pat da ka Congress.
Ka ong ruh ba ka jingkhang ïa ki dukan ha Greater Shillong kadei beit da ka mon sngewbha kum ka jingsnohkti lang ban sngewlem ïa ki mynsiem ba lui lui kiba la ngat ha katei ka apot.
“Kum ki longkmie, ngi sngewthuh ïa ka jingpang ka mynsiem jong ki hynmen para jongngi kiba ki kurim jong ki, ki shah siat hakhmat jongki hi ha Pahalgam. Kum ka ri ngi kyndit ban ïohi ïakane ka kam bymman. Tangba ka Congress pat kam ïahap ïa kane ka jingsngewlem kaba pynpaw da ki nongkhaïi ka Shillong,” bynrap biang kane ka nongïalam BJP.
