Shillong, Nailur 27: Ka Khasi Jaiñtia Butcher’s Welfare Association (KJBWA) ha ka sngi Thohdieng ka la pynpaw ïa ka jingpyrshah kaba jur ïa ka jingthmu ban pynlong ïa Gau Dhwaj Sthapana Bharat Yatra ha Shillong ha ka 2 tarik u bnai Risaw.
Ha ka shithi sha ka Deputy Commissioner, East Khasi Hills District, ka KJBWA ka la ong, “Namar kata ngi kyntu ïa phi ban ym shah ban ai jingbit ban pynlong ïa kane ka rally khnang ban pynneh ïa ka hok jong ngi hapoh ka riti synshar jong ka Ri, ban ïada ïa ka shongsuk shongsaiñ ka jylla Meghalaya bad ban pynthikna ban pyntreikam ïa ka bad ka jinglaitluid jong ngi.”
Ka la ong shuh shuh, “Kum ki nongshoh doh masi, ngi pynbiang ïa ki jingai jingshakri ba kongsan ïa ka jaitbynriew jong ngi, da kaba burom ïa ka jingjied ïa ka bam bad ki riti dustur jong ki briew ka Meghalaya.”
“Ka kam jong ngi kaba ngi trei kadei kaba shong aiñ bad ngi treikam hapoh ka jingshah teh ka riti synshar ka ri,” ka la bynrap.
“Ka India ka dei kaba synshar paidbah kaba mut ba ki nongshong shnong ki don ka hok ban jied ïa ki jingtrei (Article 19(1)(g), ka jingïada ïa ka jingdon bun ki kolshor (Article 29(1) bad ka jinglaitluid ha ka pyrkhat bad jingsngew bad ka niam ba la buh hapoh ka Article 25. Kane ka jingthmu ban pynlong bad ban khang ïa ka jingshoh doh kam pynduh ruh ïa ka lad kamai jong ngi, kan pynthut ïa jingithuh ïa ka kolshor bad kan pynkheiñ ïa ka jinglaitluid ha rukom pyrkhat bad ka niam,” ka la ong.
Ka KJBWA ka la ong, “Kane ka jingkhang ban shoh doh kan ktah shibun ïa ka lad ai kam ai jam ka Meghalaya, ha kaba ka jingïoh kam ka la nang duna katba nangmih ki sngi, kan lam shuh shuh sha ka jingkyrduh kam bad kan ktah bha shibun ïa ka ïoh ka kot.”
