Khliehriat, Naitung, 07: Mynta ka sngi ki nongïalam bad ki dkhot jong ka Jaiñtia Students’ Movement (JSM) kala leit ban buh da ka jingthoh ha u Deputy Commissioner ka East Jaiñtia Hills ban pynpaw ïa ka jingpyrshah jur halor ka jingthmu jong ka sorkar jylla lyngba ka jingpyllait khubor jong u Myntri Rangbah ka jylla hynnin ka sngi ban wan rah ïa ka lynti Rel ha East Jaiñtia Hills District.
Ka JSM ka pynpaw ba ki don shibun ki skhim bad projek kiba la pynioh da ka sorkar Pdeng kiba dei ban pyntrei hapoh ka jylla hynrei na ka liang ka sorkar jylla kam lah ban pyntreikam hok ïa ki, kum ka nuksa ka jingbym lah jong ka sorkar ban pynbha ïa ki surok NH-6 kiba ïaid lyngba na ka District Headquarter jong ka East Jaiñtia kata ka shnong Khliehriat kaba long ka surok bah kaba pyniasoh ïa ka Jylla Assam bad kiwei ki Jylla jong ka thaiñ shatei lam mih ngi, pynban ka sorkar ka thaw lad pynban ban wanrah da ka lynti Rel kaba long pyrshah ïa ka mon jong ki nongshong shnong ka District.
La ong ruh ba ka JSM ryngkat ki nongshong shnong ka East Jaiñtia Hills District ki phah ïa ka khubor kaba shai sha ka sorkar jylla ba kin iai pyrshah ïa kane ka jingthmu (Railway Project) kaba la thmu ban wanrah, kila buh da ka jingkyntu ïa ka sorkar MDA-02 ba kan pynbor ïa ka sorkar pdeng ban pyntreikam noh ïa ka Inner Line Permit (ILP), kumba la dep ban pass da ka MDA-01 ha ka 20 tarik u December 2019. Na ka liang ka seng ka ong ruh ba nyngkong ka sorkar ka dei ban pynioh shwa ïa ka ILP bad hadien kata sa pyrkhat pat ïa ka lynti Rel.
