Shillong K’ Lyngkot 02: Ka Dorbar Shnong Ur Masi-U- Joh ha ka sngi Palei haba ïakren bad lad pathai khubor ha Shillong Press club ka la pynpaw ïa ka jingpyrshah jong ka halor ka jingithuh shnong thymmai ka KHADC ïa ka shnong Mawsaw sha ka Kur Kharkongor Nongthymmai Pohkseh kaba hab hapoh u pud synshar shnong ka Ur Masi u Joh.
Na ka liang u Sordar Shnong u Bah P Wankhar u la pynpaw ka Dorbar shnong UrMasi -u -Joh ka pyrshah ïa kane ka jingithuh shnong ka KHADC ïa ka shnong Mawsaw sha ki Kur Kharkongor bad u la ong, “Na ka liang u CEM ka KHADC u Bah Pynïaid Sing Syiem bad u Bah PN Syiem ha ka por ba u dang long Dy CEM KHADC ban ai jingithuh ïa ka shnong Mawsaw sha ka kur Kharkongor hadien ba la ïoh pdiang ïa ka shithi ha ka 17 tarik Nohprah 2024 na u Dy Secretary ka KHADC ba la soi da u Bah Pynshngaiñ N Syiem Dy CEM KHADC, ka long ka jingkyndit bakhraw ban ai jingithuh shnong thymmai ïa ka Mawsaw sha ka Kur Kharkongor Nongthymmai Pohkseh kaba shu leh donbor khlem ka lynti kaba dei kaba ïuhroit ïa ki Dorbar shnong bad ki Dorbar hima Khyrim kumjuh.”
U la pynpaw ruh ba ka jingai shnong thymmai sha ka kur Kharkongor ka pynshisha ba u CEM KHADC Bah Pynïaid Sing Syiem bad u Dy CEM KHADC u Bah Pynshngaiñ N Syiem ki la leh arsap tang ban myntoi ïalade ha ka saiñ pyrthei, nangta ka Elekshon MDC ban wan kaba ym don nongrim bad ka bym lah satia ban pdiang da lei lei ruh ïa ka jingsynshar donbor ka District Council.
Shuh shuh u la ong, “Ka Executive committee jong ka Ur Masi u Joh ka la dep pynlong ïa ka jingïalang ha ka 20 tarik Nohprah 2024 da kawei ka jingmut ka la pynrem jur ïa kane ka jingithuh shnong jong ka KHADC ïa ka shnong Mawsaw sha ki Kur Kharkongor bad ka District Council ka dei ban weng noh mardor ïa kane ka hukum ka ba shu rai khlem ka lynti kaba dei. Na ka liang ka Dorbar shnong ur Masi u Joh ka la leit ïakynduh ïa u Syiem hato u Syiem u la ai jingbit lane ai Noc sha kita ki Kur Kharkongor kiba kwah shnong bad sha ka District Council, hadien ba la dep ïakynduh ngi la ïoh ka jubab na u Syiem Hima Khyrim u la pynpaw kam don kano kano ka jingaibor ne jingai jingbit ban ithuh shnong thymmai ïa ka Shnong Mawsaw sha ki Kur Kharkongor bad u Syiem u khlem ai kano kano ka jingthoh ban ithuh ïa kata ka Mawsaw sha ki Kur Kharkongor namar u Syiem u la don la ka bynta ka bakhraw kumba ka Hima Khyrim kaba bat ïa ka riti dustur ban peit ïa ka jingdonkam jong ki shnong ki thaw na ka bynta ban biang ka synshar khadar.”
“Ka Nongthymmai Pohkseh ki dei ba shu don ïa ka bri, hynrei kim don hok ban tuklar ïa u pud synshar shnong kum ba ki ong ka shnong Ur Masi u Joh ka shnong Umphyrnai ki ïa knieh ïa ka jaka ka shnong ur Masi, hynrei na ka liang ka shnong ngi ïada bad shi inchi ruh ngim shim ïa ka jaka haba dei ha hok longtrai jong ki, haba ïadei bad u pud u sam shnong ka dei ka kamram jong ngi ban tuklar ym kita ki Kur Kharkongor lada long kumta ym dei tang ka kur Kharkongor kaba don bri ki bun ki Kur ki jait kiba don bri lada kwah ban shna shnong hato ka District Council ka lah mo ban shu ai shnong katba pan ka mut baroh ki jait ba na shnong kin ïa pan shnong kaei ban jia kane ka dei ka kam ba bun balang ban thombor ïa ka synshar khadar tang ban synjor ka synshar khadar kane bym lah ban pdiang satia bad dalei lei ruh,” u la ong.
