Pyntikna u MR hapoh kane ka snem jingrakhe yn mang pisa ïaka Mini Secretariat ha Amlarem

Jowai, Naiwieng 10 : U Myntri Rangbah ka sorkar jylla u Conrad K. Sangma mynta ka lah sngi U Blei 10 tarik u Naiwieng, 2025 ula wan ban plie ïaka jingrakhe dap 50 snem ne ka ‘Jubili ksiar’ jong ka Amlarem Civil Sub-Division kaba dei ka Sub-Division kaba la rim tam hapoh ka jylla.
Ïa kane ka prokram yn rakhe ha baroh shisnem lynter ïa kaba yn pynkut haka 12 tarik u Naiwieng, 2026, halor ka phang kaba ong “Amlarem at 50-The Legacy of Leadership, the promise of tomorrow”.
Ha kane ka sngi la wan ban donlang naduh u MLA ka thaiñ ma Lahkmen Rymbui uba dei u myntri ka tnad pule puthi, u bah Sosthenes Sohtun u myntri ka tnad C&RD Block, u DC ka West Jaiñtia u Abhinav Kumar Singh, u Jagpal Singh Dhanoa, IPS, ka Anendya Raajsshre, IAS SDO Amlarem, ki MDC ka thaiñ, ki Daloi, ki ophisar sorkar bad ki paidbah nongshong shnong ka thaiñ.
Ïa ka jingïalang la pynlong ha madan Amlarem Govt. L.P School, na ka liang u Deputy Commissioner ka West Jaiñtia Hills District ula pynsngew shaphang ka jingriew spah jong ka thaiñ Amlarem naduh ki marpoh kyndew bad khamtam ïa ki jaka jngohkai pyrthei kiba la paw eh naduh ki lum ki wah, ki kshaid, ki wah um ba khuid, ki krem bad kiwei de. Da kaba ong ruh ba ka Amlarem Civil Sub-Division ka don mar khappud bad ka Ri Bangladesh.
La pynsngew ruh ïa ka Amlarem Civil Sub-Divisional la seng naduh 1976 da ka jingïalam ki riew shempang kiba la bam kwai ha dwar U Blei kata naduh ki nongïalam shnong, ki MLA, ki MDC bad ki paidbah nongshong shnong jong katei ka thaiñ.
Na ka liang ka Synjuk ki Waheh Shnong War Jaiñtia lyngba u President ma T. Rymbui kila aiti ïa ka memorandum ha u Myntri Rangbah kiba don haduh 8 tylli ki mat jingdawa naduh ka Mini Secretariat, ka jingpynbha ïa ka rukom pynpoi umbam umdih, ka jingsiang rong ïa ki surok, ka jingpynbha ïa ki PHC, ban pyntreikam pura ïaka ophis EE PWD hapoh ka thaiñ, ka jingpynbha ïa ka Amlarem Secondary School, ïa ka Veterinary & Dispensary bad ban pyntreikam pura ïa ka Amlarem Police Out Post hapoh ka Amlarem Civil Sub-Division.
Na ka liang u Myntri Rangbah ha kane ka sngi uba plie ruh ïa u mawnongrim jong ka jingdap 50 snem ka Civil Sub-Division ïa kaba yn rakhe shisnem lynter, kumjuh ïa ka mawnongrim ban tei ïa ka Multi Purpose Hall ha Amlarem WJH kaba kot 345 lak tyngka, ïa ka Multi Purpose Hall ha Amlariang Nongtalang kaba 75 lak tyngka bad kumjuh ïaka jingkyntiew kyrdan ïaka Nongtalang Govt. Secondary School sha ka Higher Secondary School (Arts & Science Stream).
U Myntri Rangbah ula pyntikna na ka bynta ban tei ïaka Mini Secretariat ha Amlarem na ka liang ka sorkar kan sanction pisa hapoh kane hi ka snem jong ka jingrakhe 50 snem, kumjuh ruh ïa ka jingpynpoi ïa ka umbam umdih bad ka jingshna ïa ki surok Internal road hapoh ka Amlarem.
Shuh shuh ula ong ba ka sorkar mynta kala pyrshang katba lah ban pynïajan bad ki paidbah ha ka rukom treikam da kaba ai nuksa ïa ka syrnot Schedule Tribe ki paidbah ki lah ban leit mih sha ki Block ban leh ïa kaba donkam, ha kaba ki Block kin phah sha ka DC Ophis bad pynpoi ïa ki syrnot ban sam sha ki Block.
U Conrad K Sangma ula kular ban ïarap hapoh 20 lak tang lyngba ka Chief Minister Special Grand na ka bynta ka jingrakhe ba shisnem lynter ïa ka jingdap 50 snem ka Civil Sub-Division.
Hadien kane u Myntri Rangbah ula ïashim bynta lang ban ïaphylliew jingmut lang bad ki nongshong shnong ka thaiñ ne ka Block Level CM Connect programme, kiba la ïakren halor ki rukom treikam jong ka sorkar naduh ka pule puthi, kam pud kam sam, ki lad jingmyntoi na ki skim jong ki nongrep, na ka bynta ki longkmie, kiba duna ha ki dkhot met, ka jingtei ïa ki Cluster Level Federation jong ki SHG, ki kam pynroi bad kiwei kiwei de.
Hashwa jong kane ka jingïalang u Myntri Rangbah ula leit ban plie ruh ïa ka ophis jong ka Block Amlarem, ka jingleit jurip ruh ïa ka Ayushman Bharat Health & Wellness Center (AAM) jong ka Jaraiñ Primary Health Center, Amlarem kaba don 50 jingthiah, kumjuh ïa ka madan ïalehkai Synthetic Football Turf jong ka Amlarem Sub-Division Sports Association (ASSA) kaba dang ïaid shakhmat ka jingpyntrei mynta ha Ladjaplem, Amlarem.