Nongstoiñ, Nailur 01: Na ka bynta ban pynkhlaiñ shuh shuh ïa ka jingtreikam jong ka seng, ki nongïalam ka FKJGP Rambrai circle ha ka sngi saitjaiñ ba la dep ka 30 tarik Nailar ki la hiar sha ka shnong Mawlieh ban pynthymmai ïa ki nongkitkam jong ka Unit.
Ha katei ka sngi shuwa ban pynthymmai bad ban pyntian smai ïa ki dkhot, la pynlong ïa ka jingïalang ba lyngkot ha kaba la pynïaid da u bah Fullmoon Marweiñ chief organizing secretary. Katba ki nongkren ki long na u bah Shanbor Nongphud secretary ka FKJGP Rambrai bad na u bah Jiedstarland Lyngkhoi president ka FKJGP Rambrai circle.
Kitei ki nongïalam ka seng haba ai jingkren ha katei ka sngi ki la ong ba ka seng FKJGP ka dei ka sengbhalang kaba trei na ka bynta ban shakri ïa ki paitbah ha ka jylla baroh kawei. Ki la ong ruh ba ka thong ba hakhmat duh jong ka seng ka long ban wanrah ïa ka jingkylla ha baroh ki liang la ka long ha ka imlang sahlang, ka pule puthi, ka kamai kajih, ka rep ka riang, ka jingkoit jingkhiah bad ruh ban peitngor ïa ka jingrung kyrthep jong ki bar jylla.
Nalor kata kitei ki nongïalam ki la ong ba haba ki samla ki rung sha ka seng ki dei ban don ïa ka jingkitkhlieh ban peit ba ka shongsuk shongsaiñ ha ki shnong ki thaw, ka dei ban don bad haba ki la rung kum ki dkhot ha ka seng kim dei ban ailad ïa ki kam sniew ba kin rung ha ka imlang sahlang, khamtam ha kine ki sngi ki dei ban peitngor bha namar u drok u la jyllei haduh katta katta bad kim dei ban ailad ba une u jingdih ba sniew un ïoh rung ha ki shnong ki thaw.
Nalor kata ki la kyntu ruh ba ki samla kiba la rung dkhot ha ka seng kim dei ban kylla long ki dieng pyngkiang ïa ka shong ka thaw bad ka imlang shalang. Hynrei ki dei ban don ka mynsiem jong ka jingïatreilang bad ki bor synshar shnong, ki senglongkmie, seng samla bad kiwei kiwei na ka bynta ban wanrah ïa ka bha ka miat bad ka suk ka saiñ.
La pynskhem bad pyntian smai ïa ki nongkitkam da u bah Jiedstarland Lyngkhoi president. Ki nongkitkam kiba la pynskhem ha katei ka sngi ki long President Mr Planding Mawlieh,Vice president Lamlynti Myrthong, Secretary Khrawpyrkhat Shangdiar, Assistant Secy Macmiland Marsharing, Chief organiser Banteilang Marsharing, Information secy Rockdinal Mawlieh, Education secy bad kiwei kiwei.
Ha kajuh ka sngi, ki nongïalam kum ka dak jong ka jingsngewlem bad ka jingshakri ïa ki para briew kiba shem jynjar na ka jingban ki jingpang jingshitom ba bun jait, ki la leit ban ai jingïarap ïa kawei ka longïing jong kawei ka riew kynthei kaba la tip kum ka kong Aisibora Lyngkhoi kaba dei na ka shnong Mawlieh West Khasi Hills District, kaba don ar ngut ki khun kiba duna ha ki dkhot met bad kaba shem jynjar haduh katta kata namar ka jingban jong ka jingduk.
