Pynthikna u CEO ban ym shah ktah ki Polling Station ha ka aïom lyiur
Yn thung tynrai dieng ha ka sngi thep vote
Shillong, ïaïong, 01: U Chief Electoral Officer (CEO) Dr BDR Tiwari ha ka Lah Sngi u Blei u la lum jingïalang ïa ki nongïalam jong ki seng saiñpyrthei bapher bapher na ka bynta ban pynkhreh ïa ka elekshon Lok Sabha ka ban sa long ha ka 19 tarik, ïaïong.
Haba kren sha ki lad pathai khubor, u Dr Tiwari u la ïathuh, namarba ka aiom lyiur ka la wan, la bthah ïa ka tnat Pule Puthi bad ïa ka tnat Revenue and Disaster Management ba kin buh jingmut lypa ban long kiba la pynkhreh namarba bun na ki Polling Stations ki dei kiba yn sa buh ha ki skul.
“Ngi kwah ban pynthikna ba ka leit ka wan kin ym shah ktah bad ki jaka rieh slap bad kiwei kiwei ki jingdonkam dei ban pynbiang ha ki Polling Station (na ka bynta ka bit ka biang jong ki nongthep vote ha ka sngi thep vote),” u la bynrap.
Katkum ka jingong jong u, ka jingdon jong ki Polling Station ka la kiew na ka 3512 sha ka 3482 ha ka elekshon MLA ba ladep long ha u snem 2023.
U la ong ba ka tnat ka la kut jingmut ban shim ïa ki lad ki lynti ban pynsngewthuh ïa ki paidbah bad khamtam ïa ki samla ba kin mih shakhmat ha ka sngi thep vote.
“Na ka bynta ka bit ka biang jong ki paidbah ha sor bad kumjuh ruh ki samla ka dei ka jingshah tynjuh kaba khraw ha ka por elekshon. Ngi la pyntreikam da ki lad ki lynti ha ki Booth Level bad bun na ki Polling Station ki duna bha ka jingpoi jong ki nongthep vote ha ka sngi thep vote, hynrei mynta ngi la shim da ka sienjam kumno ban leh katkum ka jingdon jong ki Polling Booth bad ki jingdon jong ki district. Ngi la ïatreilang bad ki dorbar shnong, ki skul, bad kiwei kiwei ki shlem ai jinghikai ban pynurlong ïa ka thong,”la ong u Tiwari.
Ha kajuh ka por, u CEO u la pyntip ba ka Meghalaya nalor ba ka dei ka jaka ba kham jyrngam ki khlaw ki btap, ka Election Commission ka la rai ban pynlong ïa ka Green Election.
“Mynta ka jinglong jingman jong ka suiñ bneng ka biang bha ban thung jingthung bad ngi la shim ïa ka rai ban pynlong ïa ka jingthung dieng khnang ban pynsah jingkynmaw ïa ka elekshon. Ha manla ki Polling Station, ngin sa thung ïa ki tynrai dieng bad ki ban ïoh thung ïa ki tynrai dieng kin dei ki nongthep vote shynrang bad kynthei kiba poi nyngkong eh ban thep vote ha ki Polling Station,” u la bynrap.