Pynstet noh ka jingtohkit CBI halor ka jingshah siat ha Mukroh, dawa ki nongshong shnong

Shillong, Naiwieng 23 : Ka Dorbar Shnong Mukroh Pyllun ha ka sngi Saitjain ka la kyntu jur ïa ka sorkar India ba kan pynstet da ka jingtohkit Central Bureau of Investigation (CBI) halor ka jingsiat ki pulit Assam kaba la wanrah ïa ka jingïap jong ki san ngut ki nongshong shnong ha ka 22 tarik u Naiwieng u snem 2022.
Katkum ka kyrwoh, ka Dorbar Shnong ka la ong, “Ngi ki paidbah ka nongshong shnong Mukroh ngi kynmaw burom ïa baroh san ngut ki nongshong shnong ha ka lyngkhuh sngi ïap da ka jingkthang ka mynsiem.”
Kane ka jingjia ka la mih tang na ka daw ka jingbym pynbeit ïa ka jingkajia pud kaba la neh slem slem bha hapdeng ka Assam bad Meghalaya ha kaba la kynnoh ba ka Assam ka la kyntur pud sha u pud u sam jong ka shnong Mukroh.
“Ngi kyntu jur ïa ka sorkar India ba kan tuklar noh mardor ban pynbeit noh ïa u pud u sam ba sahteng hapdeng ka Assam bad Meghalaya bad ruh ban bthah ïa ka sorkar Assam ba kan sangeh noh ïa ka jingkyntur pud sha u pud u sam ka Meghalaya ha shi lynter ka shnong Mukroh tad haduh ba la dep pynbeit ïa u pud u sam jong ki ar jylla.
Ka Dorbar Shnong ka pynpaw ïa ka jingsngewbynniaw ruh ba wat hadien katei ka jingjia, ka jingtohkit CBI ka khlem pat dep satia kaba la nang pynkhuslai shuh shuh ïa ki bahaiing ba shah ktah.
“Ngi kyrmen ba ka sorkar India kan sngap ïa ka jingkyrpad jongngi ban ïoh ïa ka hok bad kan ym pynbor ïa ngi ban ïaid lait na ka lynti jong ka hok,” bynrap shuh shuh ka kyrwoh.